Charter Document - 04210328

Ich Alber von Polnheim vergich an disem brief vnd tvn chunt allen den di in sehent oder horent daz ich minem herren herzogen Albrehten von Osterich minen tail an dem hovse ze wolfseke vmb drithalb hundert pfunt pfenninge ze chovffen gegeben han daz hovs halbez vnd den walt halben di garten halbe daz wismad halbez daz zv dem hovse gehoret vnd die oede halbe di dar zv gehorent vnd halb vogetay ovf drin chirichen ze Swanns ze Otspach ze Gozpoltshoven vnd wil des hie benannten gvtes mines herren scherme sin also landes reht ist vnd swaz minem herren dar an ab ge daz sol er haben ovf mir vnd ovf allev dev vnd ich han vnd gib im dar vber disen brief ze vrchunde gestaetiget mit minem jnsigel Diser brief ist geben ze Wienne do von Christes geburt waren Tovsent iar zwai hundert iar vnd einez vnd Nevnzich iar an sand Georien abent