Charter Document - 04210326

Ich Janse von Ror tvn chvnt alle den di disen brief lesent hevrent oder sehent daz ich Chvnraten von chapelle vor minem herren von pazzowe ouf han geben fvnf phvnt geltz di ich bei winchlorn het zv anderm gvet daz er von mir hat geworuen han ich im di fvmf phvnt geltz geben di hie mit namen geschriben stent ein phvnt gelz ouf dem hof ouf dem wechen [mais] den vlrich von sinzenperig von mir het ein phvnt geltz ouf der hveb in der owe di vlrichz svn von sinzenperig von mir het ein phvnt geltz ouf dem hof den Seifrid von Lanzenperig von mir het der da haizzet vor der owe ein phvnt geltz ouf der hof wise di Ornolt wolfstain von mir het di wise di albrecht wolfstain von mir het fvr sehzich phenning geltz di hueb dev dar vrounberiger von mir het fvr drej schilling geltz zwai lehen ze stvefenreit di witige von mir het fvr drej schilling geltz vnd also ist des gvetz daz ich im han geben fvmf phvnt geltz vnd bin ouch des vor genanten gvetes zv anderm gvet daz er von mir geworfen hat vnd daz ich im vor minem herren van pazzowe gestetiget han vnd ouf geben sein gewer an alle der stat vnd er sein bedarf vnd gib im des ze vrchvnde disen brief versigelt mit minem insigel Daz ist geschehen do von vnsers herren gebvrt waren tousent iar zwai hvndert iar vnd in dem ainem vnd nevnzigistem iar ze wels in der stat