Charter Document - 04210323

Ich Hainrich von Walsse vergib an disem brieve vnt tven chvnt allen den die disen brief lesent oder hoerent lesen di nv lebent vnd her nach chvnftich sint Daz daz mit meinem gveten willen vnd mit meiner gvnst geschehen ist Daz mein brvder Eberhart von walsse seiner hovsvrowen vrovn Mareien Tovsent phunt wienner phenninge gegeben hat ovf dem gvete daz vnser baider vngetailtiv satzvnge ist von vnserm herren herzog albrehte von Oesterreich vur zwai Tovsend phvnt vnd vergih ovch ob der vorgenant Eberhart mein bruder niht en were daz div vorgenante vrov Mareie vnd ir erben zins vnd nvtz swie der gehaizzen ist mit mir halben haben schvln ovf dem gvete allem sampt vnd ist daz selbe gvet her nach geschriben vnt benennet daz ist div Riedmarch vnt div vreienstat vnd svvaz in der selben Riedmarch gelegen ist mit dem Lantgerihte vnd mit allen div vnt dar inne ist swie ez genant ist versvecht vnd vnversveeht ze holtz oder zevelde vnd ist daz achlant vnd swaz zve der selben graschaft gehoeret jch schol ovch mit sampt meinen erben daz selbe gvet swaz in den vorgenanten gegenten gelegen ist daz den landes herren an gehoeret mit der vorgenanten vrovn Mareien vnd mit ir erben tailen swenne siz an mich svechet oder vodert an alle widerrede vnd an allen chriekch mit meinem gvten willen Daz daz nv also stete vnd vnzebrocben von mir vnd von meinen erben beleibe vnd ovch dester gehvgsamer sei des gib ich Heinrich von walsse der vorgenante vrovn Mareien der vorgenanten vnd ir erben disen brief mit meinem insigel zeinem vrchvnde vnt zeiner sihtigen warnvnge dierre sache vnd mit den gezivgen die her nach geschriben stent den disiv sache vnd ditz dinch wol chvnt ist Daz ist her Levtolt von Chvnringen her Stephan von Meyhsowe her Fridreich der Chamerer von Oesterreich her vlreich der elter von Chappelen her Heinrich vnd her chvnrat vnd her Seibot die bruder von Potendorf her Chvnrat von Pilhitdorf her albreht der stuhs von Trautmanstorf alber von Chvnringen Otte von Hakenberch alber von Pollenhaim her Gotschalch von vlacheneh her Herman der Marschalch von Landenberch her vlreich von Chlingenberch vnd ander biderbe levte genvege Diser brief ist gegeben vnd ist ditz dinch geschehen do von Christes gebvrt ist gewesen Tovsent iar zwai hvndert iar in dem nivnzigisten iare des nechsten mentages nach dem Ebenweihtage ze weinahten