Charter Document - 04210310

Wir Heinrich von gotes gnaden Pfallentz Grave ze Ryn vnd Hertzog ze Baiern tvon allen den chvnt die disen brief sehent vnd horent lesen daz wir den Chriech der zwischen vnserem lieben Herren Bischolf Wernharten von Pazzauwe vnd sinem Gotes Hovs von einen wegen vnd anderthalben zwischen vnseren gemeinen Dienaren Otten vnd Ortolfen von Morspach lange her gewert hat vmbe die widerlegunge die man in tvon solt vmbe die Puorch ze Morspach vnd vmbe Dreizzich pfvnt gvlte die da zv gehortent an vns genvmmen haben mit beider teil willen vnd nach ir bet in schiedmannes weis also swaz wir nach des Abbtes von Niedernaltah vnd Hern Wolfgeres des Techents von Pazzawe Heinrichs des Radekkers Vlriches von Leubolfing vnb Albers vnseres vitztumes von der Rot rate an disem Chriege vnd an dirre sache verschieden daz si daz bedenthalben an alle widerrede state solden haben Vnd da von so haben wir durch vnseres vorgenannten Herren des Bischolfs Wernhart ere vnd durch sin lieb vnd auch dvrch vnserr Dienar Fiidervnge disen Chriech vnd disiv sache also bescheiden vnd gesetzet Daz vnser Herre der Bischolf Wernhart fur sich vnd fur sin Goteshovs den vorgenannten Morspechen beiden zu rehtem lehen leihen sol Roting die Hofmarich vnd Svltzpach daz Dorf mit aller der gulte vnd mit allem dem rehte daz dar zv gehoret versuchet vnd vnversuchet also daz er imz niwan antwurten vnd leihen sol mit dem nutzen vnd mit der gvlte als er ez vnd sin Gotshovs ze diser schiedvnge inne hat Swa auch si der gvlte mer mugen inbringen zuo Roting da sol er in an nachstendich sin vnd sol auch ir gewer sin Vnd sol auch div lehenschaft zuo gen von hinne vntz auf den nahsten Liehtmesse tag Geschieht daz wol vnd gvot Mag aber sin him daz niht geschehen so sol ez geschehen von derselben Liehtmesse in einem Jar Mahte aber vnser Herre der Bischolf von hinne vntz ze der nahsten Liehtmesse Svltzpach nicht ledich machen mit reht oder mit minne so soll er den vorgenanten Morspechen ze mitterr vasten div nahste chvmt zweinzich pfvnt geben vnd sant Mychahels tage dar nach aber zweinzich pfvnt vnd wir selbe zehen pfunt vnd svln daz allez sin Pazzawer pfenning Mag aber er Sultzpach vor der nahsten Liehtmesse ledich machen so ist er vnd wir in deheinerlei pfenning schvldich noch deheiner anderr sache wan daz vnser schiedvnge danne stat beliben sol Maht aber der Bischolf von hinne vntz ze der nahsten Liehtmesse vnd von danne in Jares frist Sultzpach niht ledich gemachen mit reht oder mit minne als vor geschrieben ist so stet danne an vns swaz wir den Morspechen fur dasselbe Dorf ze Svltzpach zuo Roting nach vnserr bescheidenheit vnd nach des Abbtes vnd nach der virer rat die vorgenant sint heizzen antwurten vnd widerlegen vnd sol vnser herre der Bischolf daz tvon an alle wider rede Vnd swanne div Lehenschafte geschieht so soln die Morspechen beide von allem dem reht willichlichen vnd vreilichen gesten daz si an dem Hovs ze Morspach gehabt habent vnd von aller der gulte div darzvo gehort swie si genant ist also daz daz zehant allezsampt den Bischolf vnd daz Gotshovs angehoret an allen wider Chriech vnd sol er sich dess houss vnd der gylte zehant eigenlichen vnderwinden Vnd syln auch si des Bischolfs vnd sines Gotshovss gewer sin fur alle Ansprache War aber daz vnser herre der Bischolf in Jares frist niht enwar des got niht engebe vnd daz ein ander Bischolf der nach im chom die satze vnd die schiedvnge niht stat wolt haben als wir gescheiden haben so solden wir Hertzog Heinrich mit sampt den vorgenanten Morspechen div reht vnd die ansprach wider haben als ez vor diser schiedvnge gestanden ist vnd als ez an der alten hantveste vertaidinget vnd verschriben ist Vnd sol disiv schiedvnge vnd disev hantveste der alten hantveste niht enschaden vntz das div Lehenschafte bestatet wirt so sol si danne absin vnd svln wir si dem Bischolf widerantwurten War avch daz wir Hertzog Heinrich in der selben frist niht enwaren des got niht engeb so sol vnserr Eltistar svn diser schiedvnge gewaltich sin vnd sol si volfvren an vnserr stat Wer auch in der frist der vorgenannten schiedlaute die wir dvrch rat zu vns namen einer niht so sol man einen andern als frvmen vnd als heimliehen an desselben stat setzen vnd svln wir daz tvn nach der vorgenanten schiedlauten rat Ez habent auch die Morspechen in vnser hant gelobt ob div schiedvnge an vnseren elsten svn gevellet daz si danne der selben schiedvnge gantzlich an alle widerrede svln vndertanich sin vnd da wider niht sprechen noch chomen Vnd daz disev schiedvnge vnd disev hantveste gantz vnd vnzebrochen belibe dar vmbe habn wir disen brief mit vnserem Insigel gegeben ze einem vrchvnde Vnd ist disev schiedvnge geschehen ze Pazzawe do von Christes gebvrte waren Tavsent Jar zwei hvndert Jar vnd ahte vnd abzich Jar an sand Andreas tage