Charter Document - 04210305

Ich Leutolt von Chunring Schench in Oesterrich tun allen den chunt di disen brief ansehent daz ich meinem lieben Herren dem Bischof Heinrich von Regenspurch und sinem Goteshause erchant und vergehen han und mich mit disem brief dazu gebunten han daz min Burkch Windekk di ich ze lehen han von im und dem Gotshause ze Regenspurch und allez daz darzu gehort versucht und unversucht ez si eigen oder lehen oder Vogtai di min eigen sin oder ich hab si ze lehen von dem Gotshause in dem Luzz in der Riedmarch oder auzzerhalb zwi ez genannt ist als ez verschriben ist an den briefen di wir beid unter einander haben gegeben und mit des Herzogen Albrechts Insigel von Oesterrich und auch mit dem unsern versigelt sint daz vorgenant Gotzhaus von Regenspurch gantzlich und ledichlich angevallen soll mit allem dem Gut duz er mir ingeantwurtt hat ob ich di Gnad von Got gewinn daz ich mich in einen geistlichen orden begib [oder] daz ich erben gewinn di sun sint Ez sol auch dem Gotshaus niht schaden daz di Vogtai an den vorgenannten Hantvesten niht genennet sint ich bind auch mich mit disem brief daz ich dem Gotshaus von Regenspurch widerlegen und erstaten sol mit ander minem Gut swaz ich miner dann xxx lb Gult dem vorgenannten Bischof antwurtt ze Windekk on Chriekch und on Gevard Ich vergich auch daz mir di schrift niht frumen sol die an den vorgenannten Hantvesten stet uber daz wort ob ich erben gewinn dez vergich ich daz daz allein auf di sun geben sol und auf dhein min Tochter oder auf dheinen andern minen Vriund und auch ander sache daz daz Gut Cell und Aysthoven min leipgeding sol sin daz mir von dem vorgenannten Bischof geantwurtt ist und widersag allem geistlichen und weltlichen reht daz mir daz iht gehelfen mug ez werd allez dem Gotteshaus ledich alz ez vorgenannt ist ze hant als ich mich in ein Closter begib und im geistlichen orden erschein Ist aber daz ich einen sun oder mer sun gewinn e daz ich mich begib di mich uberlebent so sol mir allez daz stat beleiben und auch denselben sunen und ganzlich fur sich gen daz mir unter des Bischofs und des Capitels Insigel von Regenspurch verhantvestet und bestatigt ist und sol dieser brief furbaz gar ze niht sin Daz daz also stat beleib alz ez hie geschriben ist daruber han ich disen brief minem vorgenannten Herren dem Bischof von Regenspurch gegeben versigelt mit minem Insigel Daz ist geschehen datz Wienn nach Christes geburt MCCLXXXVII Jar an sand Katarein tag