Charter Document - 04210294

Ich Alheit von Rinsperch tun chunt allen den die disen prief hoernt vnt sehent daz der chriek der zwischen minen Herren Emchen dem bischof von frisingen vnt mir gewesen ist vmbe die hube vnt vmbe den man datze Haberuelde also geschaiden ist mit vnser baider gutem willen daz ich gutlichen vnt ze durhslacht von der hube datze Haberuelde gestanden pin der ich iach von dem gotshause von frisingen ze lehen auf die genade daz mir min herre pischof Emche von vrisingen die hube diu da haizet an dem Hirn gelihen hat ze rehtem lehen vntz an minen tot an walt gemerche vnt an zehenten vnt an marchfuter vnd sol daz haben als andriv miniu lehen div ich han von dem selben gotshaus vnuerchumbert verchumbert auer ichz daruber so si daz selbe guet dem gotshause von frisingen ledich Des sint gezivge Graue Gerhart der probst von sant andre Herre Friederich der probst von mostburch Graue Emche der probst von Wertse Maisier Rudger vnt Herre Herwort die Chorherren von sant andre Herre Otte der pharrer von Nivenhouen Herre Ekhart von vihdorf Herre chunrat von Vanstorf Herre Albreht der proter Herre arnolt der piber Herre Otte von zaelkingen Otte vnt albreht von vihdorf weluinch von Randeke Richer wolfstain Diser prief ist gegeben datz Waidhouen nach Christes geburt tausent iar zwai hundert iar in dem fuenf vnt ahzegisten iar des phinztages nach dem ostertage