Charter Document - 04210235

Ich hadmar von Starhenberch vergich fuor mich vnd fuor all mein eriben vnd tuen chund mit dem prief allen den di den prief sechent hoerent oder lesent daz ich mit guetem wiln verliehen han hern Vellrichen von weydenholcz vnd alln sein eriben sun vnd toechtern wye di gnant sind daz gesaes ze weidenholcz gelegen pei waizenchirchen vnd was darzue gehoert wye das genant ist oder wo es gelegen ist ich tuen im vnd seinen eriben auch sunderlich di gnad vmb sein dienst die er mier sunderlich vnd meinen vodern tan hat ob er icht mer guetz in sein gewalt pringen moecht das von mier oder von mein erben lechen waer das verleih ich ym auch vnd alln sein erben also das si dewselben lechen geben vnd geschaffen mugen wem si wellent oder wan si wellent vnd ist das mein vnd meiner erben guetlicher wiln waer aber das mein eriben ym oder sein erben nicht leichen wolten vnd vertzugen in das so sol vnd mag in ein lantzfuerst ze Oesterreich leichen vnd schullen darynn all mein eriben chain widerred nicht haben wier schullen auch vnd weln ich mein erben ier vnd ierer erben recht hern vnd gebern sein an aller der stat vnd in dez not vnd tuerft geschiecht waer aber das in darinne icht abgieng wie sich daz fuegt was sy des schaden naemen den schullen wier in ausrichten an als geuer das yem vnd seinn erben von mier vnd von meinen erben das also staet vnd vnuerchert beleib darvber gib ich vorgnanter hadmar von Starhenberch in den brief versigelten mit meim anhangunden jnsigel des sind gezewg her Rudolf von liechtenbinkchel vnd her Tietr von aistershaim her Ruedolf [Schiuer] her Sighart von Grueb her Ott von weppach leutolt lerbellaer vnd Tietmar sein prueder Marchart von der aschach vnd Tietr sein prueder vnd ander pider lawet der prief ist geben von christs gebuerd Tawsent iar zway hundert iar vnd darnach im sechs vnd sibentzkisten iar amb samtztag vor sand Giligentag