Charter Document - 04210213

Otacharus Dei gratia Rex Boemorum Dux Austrie et Styrie et Marchio Moravie omnibus in perpetuum Ut eorum que per nos aguntur proinde perennis memoria habeatur constare volumus tam viventibus quam victuris quod nos ad petitionem Dominas Abbatisse et Conventus in Erlach Ecclesie sancti Petri Jura Advocatie nostre que habent ex nostra gratia speciali universa renovamus et presentis scripti patrocinio confirmamus in hunc modum quod in Judicio nostro provinciali infra flumen Troyn et flumen Anasum nullus nostrorum Judicum provincialium in bonis Abbatie predicte nullas causas debeat judicare preter eas que mortis supplicium respiciunt ex directo quas tamen judicari volumus in proprietatibus Ecclesie antedicte Item si aliquis Judex provincialis contra aliquem hominem Ecclesie prenotate aliquam habuerit actionem debet ab Advocato Abbatisse predicte exigere justitiam et si coram Advocato convictus fuerit secundum quod cingulo precinctus fuerit provinciali Judici assignetur Res vero ipsius malefici in usus Ecclesie revertantur Item si aliquis ex hominibus Ecclesie jam pretacta quocunque casu homicidium commiserit et de culpa satisfecerit [congruenter] Advocato ipsius Ecclesie similiter satisfaciant de commisso nec provincialis Judex noster quicquam exigat de hac culpa Item nullus Judex provincialis in tota Advocatia dicti Claustri nullum prorsus detinere presumat nisi prius ab Advocato sive Judice justitiam expetat de eodem Item in provinciali judicio ex ista parte Anasi et in Judicio provinciali alia parte Danubii quod dicitur in Achlande et in Judicio inferiori ultra Amsteden universa que premisimus volumus et mandamus inviolabiliter observari Ut igitur premissa inviolabiliter observentur presens scriptum sigillorum nostrorum munimine fecimus communiri Testibus qui aderant subnotatis Qui sunt Heinricus Comes de Phanenberg H Comes de Hardekk O de Myssow Otto de Haslow Heinricus de Lychtenstein Hadmarus de Lychtenvvird Otto Camerarius de Bertholdesdorf Albero Pincerna de Celking Heinricus Dapifer de Gritzenstein et alii quam plures Actum et datum per manus Magistri Arnoldi tunc nostri Prothonotarii Anno Domini MCCLXII Pridie Kalendas Decembris