Charter Document - 04210154
| Charter Number: | 04210154 |
|---|---|
| Cartulary Title: | Oberösterreichisches Urkundenbuch, weltlicher Teil (540 - 1399 [1350]) |
| Charter Language: | Latin |
| Charter Origin: | Religious |
| Charter Type(s): | Renewal |
| Date: | 1218 |
| Date type: | Internal, A.D. |
| Resource Link(s): |
Monasterium.net |
Charter:
Ego Kalchochus de Valckenstain ministerialis Ecclesie Patauiensis ad notitiam tam presentium quam futurorum cupio peruenire ad quos presens peruenerit scriptum quod in bonis meis in loco qui dicitur Slage Cenobium exile ad honorem Dei et Beate Virginis Marie fundaui de Domini Wolkeri Episcopi Patauiensis voluntate beneuola et consensu quod ordini Griseorum dederam et ipsum locum et cenobium abbati et ecclesie in Langhaim commiseram in perpetuum ad regendum Cumque domini fratres ecclesie de Langhaim in Slage annis septem cum dimidio permansissent quodam tempore ipsum locum solitarium relinquentes in Langhaim ad monasterium suum unde uenerant noctis in silentio redierunt secum assumptis libris calicibus et ornatu de quo fui nimium conturbatus quod ipsi cenobium per me ipsis traditum contempsissent Tamen ego trinos nuncios cum litteris ipsis direxi supplicans ut redirent diligentissime et inuitans Qui deliberatione prehabita de communi consilio mihi remandauerunt quod unus Abbas et unus monachus ibi pre fame et frigore essent mortui et quod locum non amplius curarent et quod ipse fundator locum et fundationem suam in Slage assignaret et daret cuicumque vellet de eorum grata et mera ac spontanea voluntate Tunc ego quid facerem ignoravi Tandem de consilio sapientum ac etiam amicorum fundaui cenobium in alio loco et idem cenobium cum omnibus attinendis commisi et assignaui libere et solute abbati et conuentui in Milewsk ad tenendum perpetue et regendum secundum Beati Augustini et Premonstratensium regulam et statuta et in ipso cenobio fratres cum preposito ex prefato cenobio actuali vita et residentia collocaui Et ne alicui in posterum super his dubium oriatur in huius rei testimonium et cautelam dedi presentes litteras sepe dicto preposito ac fratribus mei sigilli munimine roboratas Huius rei testes sunt Chundericus filivs meus Otto de Wesen cum fratre suo Henrico Sigifridus de Morspach Wernherus de Haichenpach Rudegerus miles Wesnerii Engelbertus miles de Liechtenek Rupertus Leopoldus Gerungerus Petrus Fridericus clientes mei Datum anno Domini millesimo ducentesimo decimo octauo vii Idus Julii