Charter Document - 04210097

Alexander episcopus seruus seruorum dei dilectis filiis Henrico abbati formbacensis monasterii eiusque fratribus tam presentibus quam futuris regularem uitam professis in perpetuum Officii nostri nos hortatur auctoritas pro ecclesiarum statu satagere et earum quieti et utilitati auxiliante domino in posterum prouidere Dignum namque est et honestati conueniens esse dinoscitur ut qui ad ecclesiarum regimen assumpti sumus eas a prauorum hominum nequitia tueamur et apostolice sedis ac beati Petri patrocinio muniamus Ea propter dilecti in domino filii uestris iustis postulationibus clementer annuimus et prefatum formbacense monasterium a bone memorie Comitibus Ekkeberto et Vedalrico cognato suo pia liberatione fundatum et ecclesie Romane oblatum quod ad ius et proprietatem beati Petri nullo mediante pertinere dinoscitur ad exemplar felicis recordationis predecessoris nostri Innocentii pape sub beati Petri et nostra protectione suscipimus et presentis scripti priuilegio con munimus Statuentes ut quascunque possessiones quecunque bona idem monasterium impresentiarum iuste et canonice possidet aut in futurum concessione pontificum largitione regum uel principum oblatione fidelium seu aliis iustis modis prestante domino poterit adipisci firma uobis uestrisque successoribus et illibata permaneant In quibus hec propriis duximus exprimenda uocabulis Locum ipsum in quo prefatum monasterium situm est cum omnibus pertinentiis suis Ecclesiam in Glocnich cum decimis et possessionibus iureque parrochiali Ecclesiam in Winchil Ecclesiam in Munichiwalt cum possessionibus iureque parrochiali Parochiam et forum in Niuenchirchen cum decimis et moneta et omni utilitate que inde poterit prouenire Ecclesiam in Butine cum decimis Ecclesiam Engelbretsdorf cum decimis iureque parrochiali Ecclesiam sancti Martini in formbach cum decimis et possessionibus iureque parrochiali Ecclesiam in Eholuingin cum decimis et possessionibus Ecclesiam Antesin cum decimis iureque parrochiali Et predia grauendorf Wienuurt Rorebach Kadelingen Quicquid etiam iuris eadem ecclesia ex deuotione predictorum comitum Ekkeberti et Vdalrici necnon Hermanni fratris eius habere debet specialiter ligna pastum Edificia et quecunque adiacentis forestie utensilia uobis nichilominus confirmamus Crisma uero Oleum sanctum consecrationes altarium seu basilicarum ordinationes clericorum qui ad sacros ordines fuerint promouendi a Patauiensi suscipiatis episcopo si quidem catholicus fuerit et gratiam atque communionem apostolice sedis habuerit et ea uobis sine prauitate et exactione aliqua exhibere uoluerit alioquin liceat uobis catholicum adire antistitem qui nostra fultus auctoritate quod postulatur indulgeat Sepulturam quoque ipsius loci liberam esse decernimus ut eorum deuotioni et extreme uoluntati qui se illic sepeliri deliberauerint nisi forte excommunicati uel interdicti sint nullus obsistat Salua tamen iustitia illarum ecclesiarum a quibus mortuorum corpora assumuntur Obeunte te nunc eiusdem loci abbate uel tuorum quolibet successorum nullus ibi qualibet subreptionis astutia seu uiolentia preponatur nisi quem fratres communi consensu uel fratrum pars consilii sanioris secundum dei timorem et beati Benedicti regulam prouiderint eligendum Electus autem non aliter nisi baculo de altari accepto inuestiatur Simili quoque modo aduocatus de genere predictorum comitum magis idoneus communi fratrum arbitrio et electione constituatur qui etiam si inutilis apparuerit eundem amouendi et loco eius alium eligendi liberam habeatis facultatem Decernimus ergo ut nulli omnino hominum fas sit prefatum monasterium temere perturbare aut eius possessiones auferre uel ablatas retinere minuere seu quibuslibet uexationibus fatigare sed omnia integra conseruentur eorum pro quorum gubernatione ac sustentatione concessa sunt usibus omnimodis profutura Salua sedis apostolice auctoritate et in prescriptis ecclesiis diocesanorum episcoporum canonica iustitia Ad indicium autem huius a Romana ecclesia percepte libertatis nobis nostrisque successoribus bizantium unum annis singulis nomine census persoluetis Si qua igitur in futurum ecclesiastica secularisue persona hanc nostre constitutionis paginam sciens contra eam temere uenire temptauerit secundo tertioue conmonita nisi reatum suum digna satisfactione correxerit potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri iesu aliena fiat atque in extremo examine diuine ultioni subiaceat Cunctis autem eidem loco sua iura seruantibus sit pax domini nostri iesu christi quatinus et hic fructum bone actionis percipiant et apud districtum iudicem premia eterne pacis inueniant Amen Amen Amen Bene valete Ego Alexander catholice ecclesie episcopus SS C Ego Johannes presb Card Sanctorum Johannis et Pauli tt Pomachii ss C Ego Johannes presb Card tt S Anastasie ss C Ego Theodinus presb Card sancti Vitalis tt vestine ss C Ego Petrus presb Card tt sancte susanne ss C Ego Viuianus presb Card tt sancti Stephani in Celio monte ss C Ego Jacinthus diac Card sancte Marie in cosmydin ss C Ego Gratianus diac Card sanctorum Cosme et Damiani ss C Ego Rainerus diac Card sancti Adriani ss C Ego Matheus sancte Marie noue Cardinalis ss Data Laterani per manum Alberti sacre Romane ecclesie presbiteri Cardinalis et Cancellarii IV Kal Aprilis Indictione XII incarnationis dominice anno MCLXXIX Pontificatus vero domni Alexandri pape III anno XX