Charter Document - 04210054

Alexander episcopus seruus seruorum dei dilecto fratri in christo Altmanno patauiensi episcopo et per eum ecclesie quam in territorio eiusdem ciuitatis in portu eni fluminis construxit et in honore sancte trinitatis et resurrectionis domini nostri iesu christi et sanctorum Andree apostoli Pantaleonis martiris et sancti Nycolai confessoris consecrauit in perpetuum Conuenit apostolico moderamini religiosis desideriis et peticionibus ea benignitate et pietatis studio condescendere effectumque prebere ut dum spiritualis auctoritas officii sui debitum peragit dum pia fidelium statuta roborando venerabilibus locis presidium defensionis impendit hinc affectus superne retributionis lucratur meritum quod in prestando beneficio non minor fuerit Caritas quam potestas Hoc enim et bonorum studiis spe proficiendi augmentum tribuit et opus proprium fructu perfectionis deo acceptabile reddit Itaque dilecte frater carissima S Petri filia imperatrice Agnete semper augusta indicante nobis te in suburbio ciuitatis tue iuxta portum predicti fluminis eni ad conmunem et regularem canonicorum uitam ecclesiam construxisse et ut eam iuxta propositum tue deuotionis et constitutionis apostolicis priuilegiis firmaremus tum ipsa preces tuas referente tum ipso pro te sanctissimo desiderio postulante tanto promptius utriusque uoluntati annuendum esse iudicauimus quanto et tua uota iusta esse certius intelligimus et illius desideria diuino accensa spiritu ubique prosperari cupimus Concedentes igitur tibi et prefate ecclesie huius nostri apostolici decreti priuilegium sancimus et apostolica auctoritate statuimus ut clerici qui uel nunc in eadem ecclesia sunt ordinati uel aliquo post in tempore fuerint ordinati sub conmuni semper uita et claustrali conuersatione consistant Ad quorum conmunem usum confirmamus et incommutabiliter tenenda decreuimus determinate quidem et ea que prenominata imperatrix augusta pro remedio anime sue donauit uidelicet nonam partem omnium que ad Persinbiugen et Ibseburch ad manus suas culta redduntur et ea que tu ipse per manum aduocati tui Rainberti illuc tradidisti scilicet ante signatum portum predicti fluminis eni eum omni utilitate sua gratis quidem transponendis qui causa orationis uadunt insuper duas curtes sempftelingen et Niuwenhouen cum pertinentiis suis omnibus et unam Houesacham quam Egeno ad usum episcopi in altare sancti Stephani protomartiris dedit et duas Houesachas in loco qui dicitur Alburch et decimationem eiusdem uille cum uno manso et unam curtem Wachinwis Enzinwis cum genezeo et omni utilitate et tres houesachas de Ebechendorf cum omni utilitate Ad Richeresdorf unum mansum et unum molendinum Ecclesiam unam que dicitur Eitenbach cum omni utilitate que ad episcopum pertinebat et unam Houesacham Osta cum ceteris bonis illic pertinentibus et ad Allenchouen unum mansum cum decimatione eiusdem uille et ad zointis I mansum cum decimatione eiusdem uille Ad Rusten decimationem ad Motarn unum mansum Ad Liuben unam uineam ad Wachouwe duas uineas Ad sconenbohel duas Ad Ascha duas Ad sebach tres et tres sagenas unam patauie aliam sebach terciam Mathse Pro uestitu autem decem libras argenti de nauibus patauie Tres ad Mathse de censu Hec inquam omnia et quecunque etiam innominata bona eidem ecclesie uel nunc iuste collata sunt uel inposterum deo disponente conferenda eo tenore et auctoritate ad conmunem usum fratrum ibidem deo famulantium decernimus et corroboramus ut conmunem et regularem uitam ducentes nichil de bonis ecclesie proprio et singulari usui uendicent Vt igitur hec nostra decreta adiuuante domino undique firma illibataque permaneant apostolica auctoritate constituimus vt nullus rex imperator dux comes episcopus uel archiepiscopus seu aliqua persona secularis aut ecclesiastica prefatam ecclesiam ab eo statu et ordine quem superius confirmauimus diuellere aut aliqua perturbatione impedire presumat uel quicquam de rebus et bonis ecclesie inuadere aut diminuere uel ab usu fratrum subtrahere audeat Si quis autem contra huius nostre sanccionis decreta temerario ausu uenire temptauerit usque ad dignam satisfactionem anathematis laqueo se irretitum nouerit Qui uero hec eadem fideli deuotione obseruare curauerit diuine remunerationis gratiam et apostolice benedictionis hic et in futuro consequatur abundantiam Datum Rome V Nonas Martii Per manus petri sancte Romane ecclesie presbiteri cardinalis ac bibliothecarii Anno XII pontificatus domni secundi Alexandri pape Indictione XII