Charter Document - 04210020
| Charter Number: | 04210020 |
|---|---|
| Cartulary Title: | Oberösterreichisches Urkundenbuch, weltlicher Teil (540 - 1399 [1350]) |
| Charter Language: | Latin |
| Charter Origin: | Royal |
| Charter Type(s): | Grant |
| Date: | 0899 |
| Date type: | Internal, A.D., Calendar, Regnal |
| Resource Link(s): |
Monasterium.net |
Charter:
In nomine sancte et individue Trinitatis Arnolfus divina favente Clementia Imperator Augustus Si igitur locis Deo dicatis oportuna exhibuerimus suffragia mansura nobis a Deo [omnium] remuneratore impertiri liquido credimus gaudia Id circo cunctorum Christiane religionis presentis scilicet temporis et futuri noverit sagacitas fidelium qualiter nos divino compuncti amore intercedentibus quoque Wichingo Venerabili Episcopo et Isengrimo illustri comite ministerialique nostro ad capellam quam in loco Ranshoven Domino et sancto Pancratio martiri suo a fundamentis construximus de terra jugera duo prope [Curtem] in qua eadem constructa cernitur Ecclesia orientali parte extra parietem coniacentia ad commoditatem ipsius loci et servorum Dei ibidem divina persolvencium officia perpetuo jure ad proprium concessimus Similiter etiam molendinum unum [hactenus] ad opus nostrum pertinens in ripa fontis de Pruele parietibus circumsepto decurrentis constructum et in foresto adiacenti videlicet in Wilhart succisionem [lignorum] tam ad edificia construenda quamque ad focum nutriendum prout ipsi loco sufficere videtur Et de feno [secando] ad carradas viginti Idemque in altero foresto Honhart et [in utroque] saginacionem porcorum absque ulla districtione provisorum eidem contulimus Ecclesie pro remedio parentum nostrorum et anime nostre liberatione Et jussimus hoc presens largitionis nostre preceptum inde conscribi per quod decernimus atque [omnimodo] precipimus ut hec donatio nostra stabilis nostris futurisque temporibus nullo inquietante sed Deo opitulante perseveret quatinus divina laus et nostre orationis instantia nunc et in perpetuum augmentetur atque incessabiliter frequentetur illic Et ut hec auctoritas nostra firmiorem in Dei nomine obtineat stabilitatem in eternum manu nostra subter eam roborantes Anuli nostri impressione iussimus sigillari Signum domini Arnulfi Imperatoris Engelpero notarius ad vicem Wichingi Episcopi recognovi Data Nonis Februarii anno Domini DCCCXCVIIII Indictione [V] anno XII Arnolfi Regis Imperii autem eius III Actum in Regenespurch in Dei nomine feliciter Amen