Charter Document - 04160054

Vniuersis Christi fidelibus tam presentibus quam futuris ad quos peruenerit presens scriptum Joannes miseratione diuina Sacre Capadocie Ecclesie Archiepiscopus Regni Armenie maioris Apostolicoe sedis legatus Salutem in eo qui Crucifixus mortuus Sepultus die tertia resurrexit Quoniam Sedes Apostolica que omnium Ecclesiarum cunctorumque fidelium caput esse noscitur et magistra consueuit liberalem se petentibus exhibere non Solum in gratijs Priuilegij specialis uerum etiam in remissionibus indulgentie communis Hinc est quod Sanctissimus Pater et Dominus Papa Martinus Quartus Nos Joannem Capadocie Ecclesie Archiepiscopum Armenie Regni maioris ad Partes Hispanie destinauit legationis nobis plenarie officium iniungendo vt more Samaritani vulnerati peccatis appropiantes vinum correctionis et misericordie infunderemus conscientijs sanitatis Cumque ad dicte legationis nobis a Summo Pontifice commisse nobis effectui mancipandum iter assumpsissemus et per Noricorum territoria transitum faceremus ad Monasterium sancte et intemerate Genitricis Dei Marie Virginis gloriosas et beati Andree Apostoli ordinis Sancti Benedicti Patauiensis Dioecesis quam plurimis laboribus fatigati diuertimus nobis et nostris euectionibus quietem et commodum inquirentes Verum dicti Monasterij Pater et Abbas Otto nomine Vnacum uniuersis Fratribus nos suscepit in visceribus charitatis Cumque ab eisdem Fratribus et Patre loci intellexissemus illuc ob indulgentiam populorum frequentiam aduentare pietate permoti nihilominus consulentes populi deuotioni ne labor eorum foret irritus et inannis Authoritate nobis commissa legationis dicto loco quadraginta Criminalium dierum et centum venialium indulgentias concessimus in perpetuum duraturas omnibus uere confessis et contritis qui in festis dedicationum et Patronorum dicti Monasterij et omnium Capellarum eiusdem loci illuc concurrerint deuotionis gratia Ita tamen quod dicta indulgentia uiginti tantum dierum Festorum Sanctorum et dedicationum omnium annis Singulis non excedant dies vero Patronorum et dedicationum in quibus predicte indulgentie sunt concesse hic interserimus et presentibus annotamus videlicet in quolibet festo gloriosse Virginis Marie Matris Domini et in dedicatione Capelle eiusdem in natali et in decollatione Precursoris Joannis Baptiste Item in festo Joannis Euangeliste et ad Portam latinam in dedicatione Altaris eiusdem Item in Capella Sancti Spiritus in Pentecoste et in dedicatione eiusdem Capelle Item in inuentione et in exaltatione Sancte Crucis in dedicatione eiusdem Altaris Item in festo Patroni Principalis scilicet beati Andree Apostoli quadraginta criminalium et annum venialium Item in festo Sancti Nicolai et in dedicatione ipsius Altaris Item in festo Sancte Marie Magdalene et in dedicatione ipsius Altaris Item in festo Sancti Benedicti Item in festo Beate Marthe hospite Jesu Christi quolibet dierum dictorum quadraginta dies criminalium et centum uenialium perpetuo misericorditer in Christo relaxamus In cuius rei testimonium et perpetuam firmitatem presens scriptum nostri sigilli caractere fecimus consignari quia certe magnus fauor debetur eis qui nos exules inopes ac etiam peregrinos ad humanitatis debitum cum abundantia charitatis in Vniuersalis Ecclesie precipue et nostre fauorabiliter negotio receperunt Datum apud Monasterium Glunicense Anno Gratie millesimo Ducentesimo octuagesimo quarto Indictione decima tertia in festo Martyrum Cosme et Damiani