Charter Document - 04160003

In nomine sancte et indiuidue trinitatis patris et filii et spiritus sancti amen Otto dei gratia babenbergensis episcopus cunctis christi fidelibus imperpetuum Notum facimus uobis quod quidam nobilis homo nomjne Arnehelmus diuino instinctu proposuit cenobium et communem uitam fratrum ad honorem dej instituere in predio suo glunicke Sed morte preuentus illud non compleuit rogauitque filium suum Prunonivm ut propositum ejus perficeret Quod idem Prunonivs spiritu dei animatus deuote conpleuit tradiditque ipsam ecclesjam cum ejus pertinentiis in manum domini sui Livopoldi stirensis Marchionis ad delegandvm Sancto Petro et S georgio in babenbergensi ecclesja ut nostra prouidentja cooperante in ipso loco conuentus fratrum nigri ordinis militans sub regula uel abbate perpetuo haberetur quodque ipsa in rebus per se haberet mjnus largitas nostra suppleret Quam delegationem inlustris marchyo conpleuit cum consensu Regginomarij pataviensis episcopi Nos quoque ad incrementum diuinorum concessimus eidem ecclesie jura ac libertatem babenbergensium per omnia habere et ad profectum ejus cum consensu curie nostre assensum nostrum ac licentiam dedimus omnibus ministerjalibus nostris atque aliis beneficja a nobis habentibus possessiones suas atque beneficia illi conferre et quolibet modo ej contradere Item in propagationem familie indulsimus et statuimus ut familia babenbergensis cum familia glunicensi uicissim conubja coniungat totaque filiorum successio ad glunick pertineat Non tamen iure hereditario in patrimonio vel benefio ideo priuentur Curam avtem aduocatie ejusdem ecclesie speciali aduocato nostro predicto Marchyoni rogatu Prunonij concessimus sub tali conditione ut omnja que de rebus babenbergensis ecclesie glvonicensi cenobio a quoquam donata fuerint marchyo in sua defensione teneat aduocatiam uero ipsius aree uni de posteris Prunonij cujus industria congruat in domino tuendam conmittat Si plures filii fuerint primogenitus aduocatiam solus teneat ceteri excludantur Cuj nos consilio et iussu marchionis et prece iam dicti Prvononij specialitatem ac iuris tramitem in culparum depensionibus taliter instituimus scilicet ut quicunque sanguinis reus conuictus fuerit aduocato sexaginta denarios tantvmmodo persoluat quicquid preterea in satisfactionem majorum vel minorum culparum dandum fuerit ecclesje integraliter tribuatur Nosque prvdentum usi consilio unum de prediis ecclesie apud zucha situm e converso usibus aduocati pro labore tuende aduocatie predium mancipauimus ut et ipse pro tali labore magis celestia quam terrena expectet Coloni ecclesie placitum ejus in anno ter adeant censuales vero semel ubj abbas vel cuj hoc iusserit assit ut in suos mitivs agatur Serui in cottidiano obsequio constituti de culpis suis solummodo abbatj respondeant Aduocatus rebelles aut ab ecclesia temere se alienantes ad satisfactionem districte conpellat Nullum subaduocatum nisi pro uelle abbatis et fratrum constituat Si aduocatus tramitem iuris sibi rationabiliter prefixum excesserit pluriesque conmonitus non resipuerit in nomjne christi decernimus ut stirensis marchio ej aduocatiam cum predicto predio auferat et sine exactione rerum sed respectu eternorum in sua defensione deinceps retineat Preterea constituimus ut si ullus pontifex babenbergensis uelit illj cenobio uim inferre ad aliam conuersationem impellere abbas et fratres aureum nummvm ad babenberch offerant et liberi existant Itidem districte precipimus ne abbas vel aduocatus presumant predia ecclesie auferre vel sub iure homjnij ullj concedere Et ut istud pietatis factum inconuulsum semper maneat paginam istam fecimus inde conscribi et sigillo nostro conmvnjri testibus subnotatis Livopoldus marchio Volricus de willeheringe Rudolfus de Perge Fridericus et filius ejus gotsalch de hunsperch Gotfridus de aigest Otto Walchvon fratres de Machlande Walchhun Chunrat fratres de sunelpvrch Otto Heinricus Hartwicus fratres de pvrchstal Ernestus Heinricus Hartwicus Walther Alrammus fratres de treisme Hiskerus de trune Otto de hasilpach Perhtoldvs de iphe Rudolfvs Reinherus de stire et filii Prunonij Wilhelmvs et Arnhelmvs cum multis aliis liberis et ministerialibus Acta sunt hec anno dominice incarnationis MCXXVIII Indictione VI Sub Lothario rege Romanorum iiij anno regni ejus Regnante domino nostro iesu christo In eternvm Amen Data apud Lauriacum per manum Reginobaldj notarij Kalendis Januarij feliciter Amen