Charter Document - 04150088

Iz sol chvnt sein allen den di disen prief hoerent lesent vnd sehent daz her Joseb von Steyr vnd Gotschalich des Gvcen svn pei der Steir habent einen Hof vnd ein Lehen da pei vnd sind paidev aigen vnd haizzet datz Streblitzze den selben hofe sol der Joseb haben di weil er lept nach seinem Leben hat er den selben Hofe halben gegeben mit guetem willen sinen erwen Cbvnraten von Plesse vnd siner Havsvrowen Elspeten vnd ir paider erwen ze heistewer daz ander halftenteil an dem vorgenanten hof vnd daz Lehen da pei daz hat der vorgenant Chvnrat gechauffet im vnd siner Havsvrowen vnd ir paider erwen von Gotschalihen dem Gugen mit guetem willen siner Havsvrowen Breiden vnd ir paider erwen mit so getanem glubde ob imen nach disem guet spreche mit erbschapht der sol Cbvnraten vnd siner hausvrowen vnd ir paider erwen geben fvnzke phvnt winner phenning da ist iz fuer sein satzzvng Diser prief ist bestetiget mit disen insigeln dev hie anhangent hern Chvnrates von volchenstorf hern vlreichs von Tuersendorf hern Josebes hern Marchartes des Schechen Gotschalichs des Gvgen des sind gezevge her hainrich Prevhaven her Ditmar von Tursendorf her Ditmar von Schachen perhtolt Scheche hainrich von Stadel Pernger von Syrnich Rvdel vnd wulvinch vron Penditten svn Mendel der Pelzze Ditzze ist geschehen nach Christes gepurtt vber tavsent iar zwai hvndert iar in dem vier vnd Nevntzgistem iar des vreitages ze Chottember in der vasten