Charter Document - 04150087

Ich Heinrich Prevhaven hern Perchtoldes svne tven chund allen den die disen brieve hoerent daz ich min Hube ze wichendorf dem Gotshavs vnd der brvderschaft ze Garsten ze rechtem aigen han gegeben vnd svllen weder min erben noch min Getailen swie di sint genennet nach der selben Hube nimmermer dechain foderunge gewinnen vnd hat min herre abt Gotschalch vnd die vorgenant brvederschaft ze Garsten mit gemainem rate mir ze minen tagen den zehent an dem slvezzelhove ze leipgedinge verliehen vnd als ich nicht enbin so svln aber min erben noch min Getailen noch dem selben zehint nimmermer decheiner slachte anesprach gehaben dar vber gib ich dem selben Gotshavs vnd der Sammvnge ze Gaersten disen brieve der ze staetem vrchunde diser offenvnge mit hern chvnraten jnsigel von volchenstorf vnd mit minem jnsigel ist bezaichent des sind gezevge Her vlrich von chapelle Her chvnrat von volchenstorf Her Heinrich prevhaven min veter Her vlrich vnd her Ditmar von Tuersendorf Her josep her Marchart von Osterberch Chvnrat von Liehtenwinchel vlrich Schekhe ditmar von schachen Gotschalch von Erpfenhoven Gerunch Ruedel wuelfinch Marchart an der wis wernhart von stege vnd ander genvge Diser brieve ist gegeben nach christes geburt vber Tavsend iare zwai Hundert iare zwai vnd Nevnzig iare