Charter Document - 04140427
| Charter Number: | 04140427 |
|---|---|
| Cartulary Title: | Freising, Bistum und Hochstift (763 - 1364 [1350]) |
| Charter Language: | German |
| Charter Origin: | Lay |
| Charter Type(s): | Sale |
| Date: | 1298 |
| Date type: | Internal, A.D., Feast |
| Resource Link(s): |
Monasterium.net |
Charter:
Ich Chvnrat von Volkenstorf vergihe an disem brief vnd tvn chvnt allen den di in sehent vnd hoerent lesen daz ich mein gvt ze Waldmanstorf daz mein lehen ist gewesen von dem goteshovs ze Freisingen gesvhtes vnd vngesvhtes verchovffet han minem herren bischof Emichen ze Freisingen der sein mein rehter lehen herre gewesen ist vmb fvmfczehen pfvnt phenning vnd lob ovch an disem brief ob miner erben chainer oder ieman meiner vrevnde dem vor genantem minem herren bischof Emichen oder sinem goteshovs an dem selben gvt chainen chriech wolt machen oder tvn des sol ich sein gewere vnd ovzrihter sein an allen sinen schaden vnd gib im vnd sinem goteshovs ze vrchvnde vnd ze gezevge disen brief mit minem hangentem insigel Ditz ist geschehen da von Christes gebvrt waren tovsent zwai hvndert in dem aht vnd nevnczigistem iare des Svnnetages nach sand Philippes vnd sand Jacobs tage