Charter Document - 04140422

Ich Otte von Montparis tun chvnt allen den die disen brief an sehent oder hoerent lesen vnd vergih an disen brief daz ich frowven Gevten Vlriches des Chropfes tochter hovfrowe Winthers von Purchstal an daz gotshaus ze Freisinge gib vnd han geben vnd verzeich mich vnd alle mein erben aller der aigenschefte die ich oder mein erben haben oder haben solten an der vor genanten Gevten oder ir erben ob si immer cheinen gewint Vnd daz diu vor genant gab vnd verzeichnuezze staet sei dez gib ich meinem herren dem ersamen bischof Emchen von Freisingen vnd allen seinen nach chomen disen brief verinsigelt mit meinem insigel Daz ist beschehen dacz Flednich vf der puerg do von Christes gebverte waren tovsent iar zwai hundert iar in dem siben vnd niunzigisten iar des naechsten tags nach sant Nycolavs tag Dez ist gezivch mein herr der edel graf Emch von Ruxingen brobst von Wertse Johan der Schreiber von Lok vnd her Chvnrat von Lok Erchinger vnser diener vnd Vlrich der Chropf vnser burgraf ze Flednich vnd Vlreich Chropf sein sun vnd ander biderb leut ein michel tail di da bei seint gewesen vnd ez gehort haben