Charter Document - 04140421

Ich Leutolt von Chvnringe schench von Oesterrich vergich vnd tun chvnt allen den die disen brief ansehent oder hoerent lesen daz her Hainrich der Hvglinger in der Wachawe min diener sich vmbe sogetan ansprach vnd er gen minem herren dem ersamen bischof Emichen von Frisingen ze sprechen het vmb ein vas weines in der Wachawe auz der Altach des er dar auz ze lehen iach mit dem selben also vriuntlich verriht ist vnd vbereinchomen daz er mit gutem willen sich verzigent hat in des selben mines herren des bischofs hant aller der ansprach vnd rehtes daz er gehabt hat vnd gehabt moeht haben an dem selben lehen fuer sich vnd fuer alle sein erben vnd dar vber verzeihet er sich alles sines rehtes an dem lehen vnd gehaizzet daz er des selben lehens ob ez ieman hinnenfuer anspraeche gwer sol sein des vorgeschriben mines herren von Frisingen vnd sinen nachchomen vor einem iglichem gerihte da er ez ze reht tvn sol Dar vber daz div rihtigunge dem vorgenanten minem herren dem bischof von Frisinge vnd sinem gotshause vnd sinen nachchomen staet beliebe haben wir disen brief versigelt mit vnserm insigel nach des selben Hvglingers bet Der ist gegeben da von Christes geburit waren tausend iar zwai hundert iar in dem siben vnd nivnzigistem iar