Charter Document - 04140416

Ich Emche von gots gnaden probst ze Werdese vergihe und tun chvnt allen den die disen brief ansehent oder hoerent lesen daz ich minem vil lieben herren vnd oeheim dem ersamen bischof Emchen von Frisingen da er minen lieben bruder graf Chvnraden von Ruxingen als gnaedichlichen zu sinem heirat gefordert hat gelobt han vnd dar vber gesworn mit sampt dem selben minen bruder daz ich swenne ez dar zu chomt daz Chvnrat min bruder nicht enwaer fur in von sinem erbtail der mich von im an geuallen mach vnd auch sol vmb zwelf hvndert march loetiges silbers Wiennisches geloetes des selben mins herren des bischofs oder sins gotshauses gelter bin vnd wil sein in allem dem recht vnd er sich fvr minem bruder Chvnraden gegen dem edeln herren grauen Vlreiche von Haevnenburch verbunden hat ze der werung des vorgenanten gutes vnd swelhen schaden er oder sin gotshause furbaz gegen dem grauen von Haevnenburch da von enpfieng daz ich im dez mit rechten triwen gebvnden wil sein ab zelegen vnd auzzerihten Dar vber daz ich daz gelubde vnd den ait also staet behalte dem vorgenanten minem herren dem bischof oder sinem gotshause gib ich disen brief verinsigelten mit minem insigel Der brief ist geben ze Weltz do von Christes geburt waren tavsend iar zwaihvndert iar vnd in dem sehsten vnd niuntzigistem iar an sant Peters abent