Charter Document - 04140414

Ich Vlreich Velacher von Waldenberch vergihe vut tun chvnt allen die disen brief ansehent oder hoerent lesen daz ich sogetan ansprache und min swester Liukart weilent Berchtoldes des Duelachers witwe gehabt hat hintz minem herren dem ersamen bischof Emchen von Frisingen und sinem gotshause vmb ir gut daz si von demselben Dvelacher irm wirte angehorte an der selben miner swester stat diu ir reht vor dem erbaern ritter herrn Germanne von Waldenberch mir auf gab hintz mins herrn des bischofs gnaden dvrnaechtichlichen gelazzen han und mich wol genugt swaz er mir gegebn hat dar fvr daz wol auf fvnf march geziuhet verzihe mich fvr mich und min swester Liukart und alle unser erben aller der ansprache die wir furbaz hintz dem vorgenanten minem herren dem bischof oder hintz sinem gotshause mochten gehaben und waer daz unser dehains fvrbaz dar vber icht anders suchen wolte dar vmb setzzen wir den vor geschriben hern Germanne ze porgen der daz vber sich hat genomen und geit disen brief mit sinem insigel ze ainer vrchvnde dar vber Ich German von Waldenberch vergihe daz ich mins herren burge bischof Emchen von Frisingen bin als vor geschriben ist swelhen schaden er oder sin gotshause furbaz vmb die ansprache nimt daz ich im den ab sol tun dar vber gib ich min insigel an disen brief nach des vorgeschriben Velachers ze ainem vrchvnde Der brief ist geben ze Lok da von Christes geburt waren tausent iar zweihvndert iar und in dem fvnften und nivnzigisten iar des Vreitags nach sant Margareten tag