Charter Document - 04140406

Ich Chunrat ein ritter genant von Zauch tuen chunt allen den di disen brief sehent vnde hoerent lesen daz ich vnde Ruediger mein svn der zekagen was mit miner hant vnd mit der seinen fur vns beide vnd fur alle meiniu chint vnde erben oder nachchomen vf gegeben vnde verzigen han minern herren pischof Emchen von Frisingen in sine hant sinem gotshuse ze ewigem recht an allez vnderdinge allez daz recht daz Perchtold von Luchsenekke mit nutz vnde mit gewer gehabt het vnde mier vnde minen chinden an sinem lesten geschaffen hat vf dem hus vnd hofstat ze Weidhouen zwischen der statmaur vnd der Ybs ze swelchem reht er ez her bracht hiet vnd han gelopt fur mich vnd diu selben chint vnde erben daz wir der vorgenanten vfgabe vnde vuerziht sin vnd seines gotshauses gewer sein swa vnde swen ez ze recht an vns bracht wirdet fur alle ansprache diu in oder sein gotshaus an gegen moeht von minen chinden oder erben oder nachchomen vnde veriehen des auch beide daz der vorgenant vnser herre der pischof vns darumbe gegeben hat zehen phunt Wienner phenninge nach rate meiner lieben herren hern Marquarts des abtes von Tegernse hern Hugen des wildengrauen hern Otten von Zelkingen vnde der andern die des vnderteidinger waren vnde den ez geoffent wart die hie verschriben sint her Albrecht der hofmeister her Heinrich von dem Wasen her Vlreich von Schafferueld Ekkehart von Pauleuten vnd ander ritter knappen vnde purger Daruber han ich disen brief ze urkunde heizen verschreiben versigelten mit minem hanginten insigel datze Weidhouen des iares von unsers herren gepurt tausent iar zweihundert iar in dem dri vnde niunzegistem iar des Suntages vor sant Michelstage