Charter Document - 04140405

Ich Chunrat schench von Wintersteten tuen chunt allen den die den brief ansehent vnd horent lesen vnd vernement bezevg vnd vergih daz ich vnd her Friderich von Schafferveld vnd her Albreht der Proter gelich geholen vnd en ain getragen haben mit der schidung die min herre der hohe vnd der ersam bissolf Emch von Freising an si saczet vnd liez vnd ich also daz ich vuer di purchhuet die mir der vorgenant min herre ze sand Michelsmisse des chumftigen iares geben solt hinz Vdmarvelt vuer wein vuer waitz vuer choren vuer swein vuer ches gens hvner vnd vuer allez daz daz er mir geben solt als an miner hantvest benant ist vnd dar zu daz gelantriht min di mir min herre geit hundert phunt vnd sehzen phunt daz ich mich sein genzlich verzeich vnd dar zv vier vnd drizzich phunt di er mir ze erung geit Vnd daz daz also stet vnd gewis sei vnd beleibe da gib ich disen brief vber ze vrchuend vnd ze zevgnuesse behangen vnd versigelt mit minem insigel vnd mit hern Fridriches insigel von Schafferveld vnd hern Albrehts des Proters di des dinges schiedlevt waren Der brief ist gegeben dacz Vdmaruelt da von Christes geburt waren tausent iar zwaihundert iar vnd iz dem drev vnd nevnzigstem iar an dem ahten tag nach Ostern