Charter Document - 04140389

Ich Ott von Zinzendorf vnd ich Heinrich wir ped brueder vnd ch Daniel von Petzenchirchen vnd ich Hauch von Prespach wir veriehen an diesem prief vnsem herren dem bischof Emchen von Vrising daz wir porgen sin worden vnuerschaidenlichen vur Heinrich den Hubaer der in siner vanchnuess ist gewesen also daz er lant vnd levten an allen schaden sol sin vnd er vnd all sin vrevnt aller der vrevnt soln sin die an siner vanchnuess schuldich sint gewesen vnd des bischofs gut von Vrising vnd sinen levt vnbechvmbert suelen sin mit chlag oder mit werchen von dem selben Heinrich vnd von sinen vrevnten vmme di sache vnd praech er aber daz indert mit worten oder mit werchen so svlen wir svldich sin sehtzich pfund pfenning dem vor genanten herren bischof Emchen von Vrising oder sinen nachchomen vnd sinen schaden abtun vnd als offt er ditze gelvbd prichet als offt geben wir vns svldich sehtzich pfund zegeben dem vorgenannten herren oder sinen nachchomen ob er niht ist vnd sinen schaden abtun des man in mit reht vberuaren mach vnd haben auch gelobt vur in zantwrten vmme des lants schaden des er mit reht vnd mit guter gewizzen vberuaren wirt Dar vber daz dicz gelvbde staet belibe ich Ott vnd ich Heinrich von Zinzendorf geben disen prif versigelt mit vnsem hangentem insigel Disiv taidinch sint geschehen dacz Waydhouen nach vnsers herren puertt tausent iar zwaihvndert iar in dem vumf vnd ahtzigst iar des Samcztages in der Osterwochen Des sint gezevg graf Gerhart probst von sand Andre dacz Vrising probst Friderich von Mosburch probst Emch von Wertse maister Rudger chorherr von sind Andree her Ott der pfarraer von Nivnhoven her Ekkart von Vichdorf her Chvnrat von Vanstorf her Albreht der Protaer Ott von Tannberg Ott von Aistorf vnd sin bruder Rudger Jevbart von Perwestorf Philipp der Hagaer vnd ander vrum levte