Charter Document - 04140377

Wir Emch von gots genaden bischolf ze Freisingen tun chunt allen den di disen brief sehent vnt horent daz uus gewizzen ist mit der warhait vnt daz uns iz gesagt habent erbaer levt di da bi gewesen sint und iz horten und sahen daz vnser voruar bischolf Fridereich von Freisingen mit saezzen und mit ouzgenomener rede als noch sein brief veriehent vnserem lieben vreunt hereu Meynhart dem edelen grauen von Tyrol vnt vou Goerz der vogt ist ze Agelay ze Trient vnt ze Brixen daz halbe tayl an der burch Evrs in Vinschev vnt an dem vrbor daz zu der selben burch hoeret auch halben tayl verlihen hat ze rethem lehen im vnd seinen erben als iz di grauen von Mosburch in rether lehens gewer brahten vnz an ir tot von dem gotshous von Freisingen Nu veriehen ouch wir bischolf Emch daz wir von sunderen genaden im grauen Meynhart vnserm lieben mage vnt seinn erben den andern tayl an der selben burch Evrs vnt an demselben vrbor daz zu der selben burch gehoeret daz dem gotshous von Freisingen was ledich worden verlihen haben ze rethem lehen gesuchet vnd vngesuchet als iz di vorgenanten grauen von Mosburch ze rehtem lehen von dem gotshaus von Freising heten gehabt So hat auch vnser lieber vreunt graue Meynhart von Tyrol vns gelobt in vnser hant mit seinen trewven vnt hat sich vns des gebunden daz er vns vnt vnserm gotshous von Frising trewve vnt warhait immer mere laeisten sol unsern vrum ze voerderen vnd vnsern schaden ze wenden als verre in seine sinne leiten vnd sin maht vnd hat vns avch des sunderlich gelobt daz er vnser levt vnd vnser guet vnd swaz vnser gotshovs an hoeret swa ez in seiner herschaft ist svnderlich vor allem gewalte vnt vor allem vnrehtte sehermen sol mit gvten trewven des ouch wir im wol getrowven Vnd daz disev lehenschaft als vor bescheiden ist immer mer stete beleibe so geben wir im vnd seinen erben disen brief ze aeinem rehtten vrchunde mit vnserm hangenden insigel vnt sint diser lehenschaft gezevge maister Heynrich der probst von Wertse maister Herman der probst von Ardacher di Chorherren sint ze tume ze Frising her Heynrich von Woluoltstorf her Rvtholt der Gebelspech vnsers gotshous dienstman her Heynrich von Owenstayn graue Meynhartes dienstman von Tyrol vnd Wilhalm des selben grauen Meynhartes schreiber vnd dizze ist geschehen an dem vrbar ze Taezzen an der Sawe nach Christes geburt veber tousent vnt zwayhundert iar an dem drei vnd ahtzgistem iar des nahsten Mantages vor sunewenden Johannis baptiste