Charter Document - 04140366

Nos Conradus dei gracia Frisingensis ecclesie episcopus scire volumus universos presentium notitiam habituros quod cum investi investigante sancti spiritus gratia et fervore divini amoris inflammante dilectus nobis Conradus notarius de Waidhoven zelo devotionis accensus basilicam sancti Johannis apostoli et evangeliste in parochiali ecclesia Waidhoven pro sua et aliorum omnium consanguinitate vel affinitate sibi coniunctarum animarum remedio propriis sumptibus erexisset hocque ipsius devotis precibus inclinati de gratia sibi concessimus speciali ut eandem basilicam posset dotare de prediis seu de possessionibus per ipsum comparatis ad nostram collationem seu infeudationem spectantibus usque ad summam reddituum trium librarum prout in litteris nostris super hec confectis plenius continetur Hac itaque gratia sibi a nobis obtenta idem Conradus dictam basilicam dotavit cum redditibus duodecim solidorum Wiennensium nummorum talibus condicionibus appositis et adiectis videlicet quod inperpetuum omni septimana per plebanum et sacerdotes qui pro tempore fuerint in ipsa basilica tres misse celebrentur que sic per hebdomadam sunt divise videlicet omni quidem die Dominica in ortu diei dicenda erit de sancta et individua trinitate alia missa que tunc convenit tempori et diei Dicetur etiam in eadem missa una collecta de beata semper virgine Maria et una de sancto Johanne apostolo et evangelista et in fine illa collecta Omnipotens sempiterne deus qui vivorum dominaris et mortuorum [] Item feria tercia dicenda est inperpetuum missa de apostolis cum collectis predictis vel missa de animabus item omni die Sabbatho missa de sancta Maria cum collectis superius declaratis nisi superveniens alia summa festivitas et solemnitas impediat Ad hec prefatus Conradus statuit et ordinavit quod census dicte basilica deserviens inter plebanum si residens fuerit et sacerdotes equaliter dividatur si vero plebanus in loco parochiali non haberet residentiam personalem tunc sacerdotibus qui ad huiusmodi missas celebrandas erunt obligati predictus census in quolibet suo festo erit integraliter assignandus Predia vero seu possessiones et tempora unde et quando prelibatus census persolvendus erit taliter distinguuntur videlicet in festo beati Michaelis de beneficio in Ainsidl dabuntur tres solidi annuatim in festo beati Johannis quod in Nativitate domini peragitur de domo ipsius Conradi in Waidhoven tres solidi erunt dandi item in festo ipsius Johannis qui dicitur ante Portam Latinam de decima in Fribresteten tres solidi et in festo sancti Johannis baptiste de vinea in Wagram tres solidi persolventur Prenominata autem predia seu possessiones de quibus dictus census solvendus singulis annis erit prelibatus Conradus cum consensu uxoris sue suorumque heredum super aram sancti Johannis apostoli et evangeliste in prefata basilica constructam iure proprietatis libere tradidit et legavit postmodum eadem predia et possessiones idem Conradus recepit a magistro Henrico Werdensi preposito tunc plebano in Waidhovn pro se et Chunegunde uxore sua et pueris eorum iure emphiteutico quod vulgariter burgkrecht dicitur perpetuo possidendum ita quod quandocunque ipse Conradus et Chunegundis uxor sua vel ipsorum puerivel quicunque eis successerint in ipsis prediis et possessionibus prefatum censum non solverint in statutis diebus et terminis tunc plebanus loci habebit potestatem se intromittendi in dictis prediis et possessionibus mediante iusticia et agendi de iisdem prediis et possessionibus quod dicte basilice videtur expedire Si vero per negligentiam plebani vel sacerdotum quodcunque de statutis missis fuerit retardatum tunc sepe dictus Conradus habebit potestatem retinendi tantum de dicto censu quantum in dicendis missis fuerit pretermissum seu quicunque possessor predictorum prediorum seu possessionum fuerit et id per eundem Chunradum vel alium prefata predia et possessiones possidentem omni die Dominico pauperibus qui tunc in hospitali fuerint aliisque pauperibus erogetur Ne igitur per nos vel nostros successores vel memoratum prepositum sepe dicte ecclesie plebanum sive per alios in eadem ecclesia sibi canonice substituendos vel per dictum Conradum seu per suos heredes tam presentes quam futuros possit in posterum presens ordinatio in irritum revocari presentem paginam in evidens testimonium et per omnem memoriam nostri pendentis sigilli munimine atque prelibatorum prepositi et Conradi sigillis pendentibus iussimus roborari Datum et actum apud Waidhovn anno domini MCCLXXVIIII VI kalendas Martii