Charter Document - 04140361

Rudolfus dei gratia Romanorum rex semper augustus inperpetuum Cum ad regalis officii sollicitudinem pertineat litibus et controuersiis finem imponere ne vnius controuersie terminus alterius litis fiat exordiuna notum fieri volumus presentium inspectoribus uniuersis quod cum inter dilectos fideles nostros magistrum Henricum prepositum Werdensem cappellanum nostrum nomine ecclesie sue ex una et Ottonem de Vinchenstein super iure aduocatie ipsius Werdensis ecclesie et quibusdam dampnis et grauaminibus et excessibus ab eodem Ottone et eius progenitoribus contra clerum et homines eiusdem Werdensis ecclesie sepius et grauiter perpetratis ex parte altera controuersia diutius verteretur nos ad ipsius prepositi grauem querimoniam excitati venerabili Berhtoldo episcopo Babenbergensi dilecto principi nostro causam eandem per iustitiam uel amorem commisimus terminandam qui terre Karinthie iuris et consuetudinis non ignarus de consensu partium in eundem episcopum tanquam in arbitratorem seu amicabilem compositorem compromittencium de prudentum consilio arbitratus est taliter inter partes Cum igitur memorati prepositus et Otto quibus huiusmodi arbitrium placuit et illud emologauerunt expresse prout per eorundem litteras quas pro confirmacione nostro culmini direxerunt claruit euidencius nobis attentius supplicarunt quatenus aliqua formidabili pena apposita et adiecta sententiam huiusmodi prolati arbitrii confirmare dignaremur nos earundem partium precibus inclinati eiusdem arbitrii sententiam a partibus acceptatam et approbatam auctoritate presentium confirmamus et eandem firmam et illibatam sine nostro et imperii preiudicio iubemus aput omnes consistere roburque perpetuum obtinere Si autem quod absit prefatus Otto de Vinchenstain aut eius heredes uel homines dei timore postposito in proprie salutis dispendium et nostre regalis magnificentie contemptum contra presentem nostre confirmationis seriem aut contra huiusmodi promulgati arbitrii sentenciam et tenorem ausu temeraria in parte aliqua venire presumpserint ab omni iure aduocatie quod se habere in prelata Werdensi ecclesia contendunt et asserunt se suosque heredes nouerint perpetuo cecidisse et nichilominus centum marcas denariorum vsualis monete persoluant quarum medietas camere nostre cedet et alia medietas in vsum seu in fabricam Werdensis ecclesie conuertatur Ne igitur nostre confirmationis presens pagina aut per easdem partes uel per alias quascunque personas inposterum violari valeat vel mutari eandem nostre regalis excellentie pendenti sigillo in perhennem memoriam et maiorem roboris firmitatem iussimus communiri Datum et actum Wienne in aula nostra regali anno domini millesimo CCLXXVIIJ octauo idus Maii indictione sexta regni nostri anno quinto