Charter Document - 04140328
Charter Number: | 04140328 |
---|---|
Cartulary Title: | Freising, Bistum und Hochstift (763 - 1364 [1350]) |
Charter Language: | German |
Charter Origin: | Lay |
Charter Type(s): | Decree |
Date: | 1277 |
Date type: | Assigned |
Resource Link(s): |
Monasterium.net |
Charter:
Ich Marchwart Privhafen vnd der her Ch Gliuss vnd ander piderwe ritter vnd knappen die der pi gewesen sint di habent geseit daz Aspach der marcht also gestift si von dem herzogen Liupolden daz einer meil sol niht vails sein an ze dingesteten vnd da ze pharren In der meil sol auch dehein hantwerich sin an ze pharren vnd daz des herzogen burger daz di iht fver varen des maentags si suchen den marcht an dem eritag ze Aspach Daz selb reht daz hat des tvmfvt liut vnd marcht von sant Peter vnd chumt ein gast der dem herzogen niht an wint der sol da beliwen vnz daz er den marcht gesuch oder er sol varn mit des rihters vrlab vnd das chorn oder salz daz man feurt oberhalb Ardacher oder niderhalb Erlach daz man fvr fevren welle daz sol man fevren ze Aspach vnd sol ez da vail haben vnd swaz ysens maen fuert durch di perge daz hat niderlege dazze Aspach So hat er auch daz reht swelich gast durich di perge mit sinem chaufschaze fert der sol ez vuren ze Aspach vnd sol ez da vaeil haben und daz si auch Enser reht haben vnd swelich man chumt auf den marcht ze Aspach hin ze dem selben sol maen niht rihten vm dehein schulde ez si denne vmbe vnreht oder vmbe ein mort Vnd ist des geziuch her Mar Privhafen vnd her Ch Gliusse vnd der Gundacherer Oede vnd ander Hut di der bi waren