Charter Document - 04140310
| Charter Number: | 04140310 |
|---|---|
| Cartulary Title: | Freising, Bistum und Hochstift (763 - 1364 [1350]) |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1275 |
| Date type: | Internal, A.D., Calendar |
| Resource Link(s): |
Monasterium.net |
Charter:
Nos Chunradus dei gratia Frisingensis episcopus notum esse uolumus vniuersis ad quos peruenerit presens scriptum quod cum inter nos et ecclesiam nostram ex una parte et virum discretum Ditmarum de Grifenuels ex altera super diuersis dampnis iniuriis et grauaminibus que nobis ab ipso D et suis seruitoribus sibique a nobis et nostris hominibus mutuo et uicissim dicebantur illata orta esset hinc inde materia questionis nos ad tollendam omnem litem sev contentionem que sibi et hominibus suis contra nos et nobis hominibusque nostris contra ipsum super hiis competere uidebatur indifferenter concorditer cum ipso in venerabilem fratrem magistrum Heinricum prepositum Werdensem et in dominum Rachwinum de Wipaco militem duximus tamquam in arbitros compromittendi promittentes fide data uice sacramenti tam nos pro nobis et hominibus nostris quam idem D pro se et hominibus amicis et seruitoribus suis vt quicquid predicti duo arbitrentur super omnibus premissis inter nos ad perpetuam amiciciam faciendam hoc ratum a nobis utrisque seruaretur atque firmum Sane predicti arbitri dampnis sev grauaminibus utriusque partis diligentius consideratis et inspectis inter nos et ipsum D sunt taliter arbitrati vt uniuersa dampna sev grauamina qualitercumque et quandocumque predicto D per nostros et nobis hominibusque nostris per ipsum et suos sint commissa extincta debeant esse hinc inde et mutua recompensacione sublata ita quod neuter nostrum contra alterum uel contra homines alterutrius de hiis que inter nos et ipsum D hucusque fuerant in questione aliqua competere debeat actio uel querela Insuper oranes promissiones sev cautiones fideiussorie et inimicitie que occasione predicte dissensionis contracte sunt inter homines nostros et predicti D de medio debeant esse sublate nosque cum ipso et ipse nobiscum erimus in perpetua concordia et in pace Ad hec vt sepe dictus Ditmarus ad nostrum obsequium feruencius obligetur nos sibi ex mera liberalitate xxxvi marcas Aquilegensium antiquorum dare promisimus quas eidem D persoluere tenebimur in festo Georii proximo nunc venturo nichilominus recipientes ipsum in nostram specialiter graciam et fauorem In huius itaque arbitrii euidens testimonium presentem cedulam conscribi iussimus et ipsam nostri et predictorum arbitrorum ac ipsius Ditmari uolumus sigillorum munimine roborari Datum et actum aput Lok anno domini millesimo CCLXXV XVII kal Januarii