Charter Document - 04140270
| Charter Number: | 04140270 |
|---|---|
| Cartulary Title: | Freising, Bistum und Hochstift (763 - 1364 [1350]) |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1267 |
| Date type: | Assigned |
| Resource Link(s): |
Monasterium.net |
Charter:
Nos Fridericus permissione diuina prepositus Frisingensis et magister Chunradus canonicus sancti Andree presentibus profitemur et scire volumus vniuersos quod cum reuerendi viri venerabilis abbas Ge[r]stensis et magister Wernhardus decanus Patauiensis et nos vnacum ipsis essemus electi arbitrii siue amicabiles compositores ad sopiendam litem iam dudum ortam inter reuerendum in Christo patrem dominum C Frisingensem episcopum et eius ecclesiam ex una parte necnon venerabiles viros abbatem et conuentum monasterii in Sitansteten ex altera super iure patronatus de Waidhoven de Aspach et de Hollenstein ecclesiarum necnon attinenciis earundem prefata questio accedente consensu auctoritate reuerendi patris in Christo domini Petri Patauiensis episcopi et de communi consilio dictorum abbatis et decani necnon et nostro Salzburge taliter est decisa videlicet quod dicti abbas et conuentus de Sitansteten perpetuo tenebunt ecclesiam in Aspach cum omni iure presentandi quemadmodum tenuerunt eam ante litem motam nullo iure presentandi Frisingensi episcopo vel eius successoribus in ipsa ecclesia remanente decimas insuper ecclesiarum in Waidhouen et in Holenstein colligent et recipient in vsus suos et monasterii sui perpetuo quemadmodum receperunt ab antiquo ecclesia in Opocnic ad parrochiam in Holenstein tanquam ad matricem ecclesiam perpetuo redeunte prebenda insuper sacerdotum siue nunc institutorum siue in posterum per reuerendum Frisingensem episcopum aut eius successores ad ipsas ecclesias Waidhoven et Holenstain presentandorum sicut erat ante litem motam in nullo per abbatem aut eius successores decisa uel diminuta hoc adiecto quod prebenda in Holenstain que fuit ante litem motam debeat per abbatem et conuentum cum decimis ipsius ecclesie in reditibus ad valorem vnius libre monete Wiennensis augmentari et si reuerendo patri Patauiensi episcopo videbitur propter iura episcopalia et necessitatem secundi sacerdotis ipsam prebendam de decimis prelibate parrochie moderabitur largiorem prebendam autem ecclesie in Waidhoven antiquam prefati abbas et conuentus ad valorem dimidie libre cum decimis meliorabunt iure presentandi et eligendi personas ad prefatas duas ecclesias Waidhoven et Holenstein perpetuo aput Frisingensem episcopum eiusque successores remanente nullo iure dictis abbati aut conuentus in predictis duabus ecclesiis vel eorum sacerdotibus aliter quam predictum est reseruato Ad hec predicti abbas et conuentus eorumque successores eorum prouisione reuerendi patris Patauiensis episcopi et ex forma arbitrii promulgati soluent annis singulis in omnen euentum magistro Heinrico canonico Frisingensi plebano de Waidhoven iii libras monete Wiennensis pro tempore vite sue et magistro Hermanno canonico sancti Andree plebano de Holenstein pro tempore vite ipsius iii libras eiusdem monete racione decimarum ecclesiarum earundem certa pena in defectu ipsius solucionis deputata In cuius rei perpetuam memoriam et euidenciam presentes nostri sigilli munimine duximus roborandas