Charter Document - 04140261
| Charter Number: | 04140261 |
|---|---|
| Cartulary Title: | Freising, Bistum und Hochstift (763 - 1364 [1350]) |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1266 |
| Date type: | Internal, A.D. |
| Resource Link(s): |
Monasterium.net |
Charter:
Amico suo karissimo viro nobili domino Meinhardo illustri comiti Gorizie et Tyrolensi aduocatoque Aquilegensis Tridentine et Brixinensis ecclesiarum Chunradus dei gratia Frisingensis episcopus promptam et paratam ad quelibet beneplacita uoluntatem Specialis confidentia quam de uobis gerimus nos inducit ut omni tempore hiis debeamus efficaciter intendere que uestri honoris et comodi respiciunt incrementum sperantes quin sicut cepistis nos et ecclesiam nostram manutenere debeatis in omnibus et fauore et amore prosequi speciali Sane ad instantiam dilectorum in Christo fratrum capituli nostri aduocaciam predii in Layan pertinentis ad communem prebendam ipsorum fratrum nostrorum cum omnibus iuribus et attinenciis suis sicut eandem quondam marchio de Andesse tenuit et possedit uobis in feudum conferimus per presentes volentes vt quicquid ab eadem aduocacia per potentiam seu inprouidentiam alienatum est aliterue distractum debeatis per uestre iurisdictionis prouidentiam et industriam reuocare hoc tamen adiecto ut dictis fratribus nostris ius proprietatis quod eis in dicto predio Layan conpetit semper recognoscere debeatis et uinum eorum uidelicet de qualibet huba sex vrnas mensure de Bozano sicut ab antiquo et tempore ipsius marchionis permissum est permittatis sine theloneo et exactione qualibet per uestrum districtum sub uestre defensionis et ducatus presidio extraduci In cuius rei euidentiam presentes uobis dirigimus nostri et capituli nostri sigillorum munimine roboratas Datum Frisinge anno domini MCCLX sexto VI idus Junii