Charter Document - 04140259
Charter Number: | 04140259 |
---|---|
Cartulary Title: | Freising, Bistum und Hochstift (763 - 1364 [1350]) |
Charter Language: | Latin |
Charter Origin: | Religious |
Charter Type(s): | Decree |
Date: | 1266 |
Date type: | Internal, A.D., Calendar |
Resource Link(s): |
Monasterium.net |
Charter:
Erbo dei gratia archidiaconus Ratisponensis ecclesie iudex a sede apostolica delegatus uicemque gerens domini Kalhohi sui coniudicis in hac parte ac Pertoldus archidiaconus iudex in eadem parte subdelegatus a venerabili preposito eiusdem ecclesie Ratisponensis viro discreto [] decano Laureacensi salutem et sinceram in domino caritatem Cum causa que vertitur inter venerabilem abbatem et conuentum monasterii sancte Marie de Sytansteten ex una parte et Eberhardum et Heinricum de Waydhouen et de Holenstein presbiteros ac Vlricum militem dictum de Lusnic et alios parrochianos ipsarum ecclesiarum de Waydhouen et de Holenstein ex altera nobis auctoritate apostolica sit commissa mandamus uobis auctoritate apostolica qua fungimur in hac parte sub pena excommunicationis precipientes firmiter et districte quatinus predictos presbiteros Eberhardum et Heinricum ac V militem et ceteros parrochianos ad nostram peremptorie citetis presentiam per uos uel per alium ad procedendum coram nobis in dicta causa secundum retro acta et quantum de iure postmodum fuerit procedendum locum Ratispone in ecclesia maiori diem uero primam sextam feriam post Dominicam qua cantatur Oculi mei semper prefigentes eisdem et si predictus dies fuerit feriatus prefigatis eis primum diem peremptorie similiter qui non fuerit feriatus Mandamus etiam uobis auctoritate predicta ut postquam citaueritis uniuersos et singulos supradictos nobis de hoc fidem faciatis per patentes litteras uestro sigillo signatas et nobis quicquid inde feceritis rescribatis Datum Ratispone anno domini MCCLX sexto X kalendas Februarii