Charter Document - 04140234
| Charter Number: | 04140234 |
|---|---|
| Cartulary Title: | Freising, Bistum und Hochstift (763 - 1364 [1350]) |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1264 |
| Date type: | Internal, Papal |
| Resource Link(s): |
Monasterium.net |
Charter:
Urbanus episcopus servus seruorum dei Dilectis filiis [] abbati monasterii de Cremismunster et preposito ecclesie sancti Fluriani Patauiensis diocesis salutem et apostolicam benedictionem Petitio dilectorum filiorum [] abbatis et conuentus monasterii sancte Marie de Sitansteten ordinis sancti Benedicti Patauiensis diocesis nobis exhibita continebat quod Fredericus abbas monasterii de Gleuniaco eiusdem diocesis in Eberhardum de Waidhouen et Henricum de Hollenstain presbyteros predicte diocesis pro eo quod ipsi prefatas ecclesias cum iuribus et pertinentiis earundem ad eosdem abbatem et conuentum de Sitansteten spectantes per uiolentiam occuparant et ab eodem abbate de Gleuniaco moniti diligenter ecclesias ipsas eis restituere contumaciter denegarunt cum hoc esset ita notorium quod nulla poterat tergiuersatione celari auctoritate venerabilis fratris nostri Ottonis Patauiensis episcopi loci diocesani excommunicationis sententiam exigente iustitia promulgauit Otto quoque decanus Christianitatis Lauriacensis dicte diocesis presbiterorum ipsorum crescente contumacia easdem ecclesias auctoritate ipsius episcopi suadente iustitia ecclesiastico supposuit interdicto Verum memorati presbyteri huiusmodi excommunicationis sententiam dampnabiliter contempnentes in eisdem ecclesiis interdictis diuina officia celebrare immo uerius quantum in eis est profanare presumunt in animarum suarum periculum plurimorum scandalum et eorundem abbatis et conuentus preiudicium et grauamen quare nobis humiliter supplicarunt ut eandem excommunicationis sententiam robur firmitatis debitum obtinere dictosque presbyteros puniri pro presumptione huiusmodi pena canonica mandaremus Quocirca discretioni uestre per apostolica scripta mandamus quatinus sententiam ipsam sicut rationabiliter est prolata faciatis auctoritate nostra usque ad satisfactionem condignam appellatione remota inuiolabiliter obseruari Super eo uero quod predicti presbyteri sic ligati in predictis ecclesiis diuina officia celebrare presumunt quod canonicum fuerit appellatione postposita decernatis facientes quod decreueritis per censuram ecclesiasticam firmiter obseruari inuocato ad hoc si opus fuerit auxilio brachii secularis Datum apud Vrbem ueterem V idus Martii pontificatus nostri anno tertio Jacobus de Meuania