Charter Document - 04140233

Urbanus episcopus seruus seruorum dei Dilectis filiis [] preposito ecclesie sancti Magni Ratisponensis [] thesaurario Eistetensi et Altemanno de Rotenecke canonico Ratisponensi salutem et apostolicam benedictionem Dilecti filii [] abbas et conuentus monasterii sancte Marie in Sitansteten ordinis sancti Benedicti Patauiensis diocesis de Aspach de Waidhouen et de Hollenstain ecclesiarum patroni sua nobis petitione monstrarunt quod cum venerabilis frater noster Ch episcopus et capitulum Frisingense eosdem abbatem et conuentum super iure patronatus earundem ecclesiarum quarum se patronos mendaciter asserebant coram magistro G canonico Patauiensi auctoritate apostolica conuenissent tandem idem canonicus postquam ipse lite in causa huiusmodi coram eo legitime contestata aliquamdiu in ea duxerat procedendum Vlrico tunc abbati monasterii de Gersten predicte diocesis commisit super hoc usque ad diffinitiuam sententiam uices suas Sane idem subdelegatus usque ad calculum huiusmodi sententie rite processit et demum remisit ad eundem canonicum causam ipsam qui cognitis eiusdem cause meritis et iuris ordine obseruato diffinitiuam pro dictis abbate et conuentu sententiam promulgauit sed iidem episcopus et capitulum de hoc tacito falsoque suggesto quod nominatus canonicus prefato subdelegato ad certam diem in dicta causa commiserat uices suas et quod pro parte ipsorum episcopi et capituli ab eodem subdelegato ex eo ad prefatum canonicum fuerat appellatum quod subdelegatus ipse post elapsum diem predictum in causa huiusmodi procedebat quodque ipsi episcopus et capitulum ab eodem canonico quia non solum processum prelibati subdelegati quem post diem et appellationem predictas in dicta causa ad diffinitiuam sententiam de facto processisse mendaciter proponebant irritum nuntiare nolebat uerum etiam processum contra iustitiam approbarat eundem ad sedem apostolicam appellarant super hoc ad [] abbatem monasterii de Tyrhoupt Augustensis diocesis sub ea forma ipsius sedis litteras impetrauit ut uocatis qui uocandi essent et auditis hinc inde propositis quod canonicum esset statuere procuraret et faceret quod decerneret per censuram ecclesiasticam firmiter obseruari Verum memorati abbas et conuentus sancte Marie ex eo sentientes ab ipso abbate de Tyrhoupt in cuius presentiam propter hoc citati fuerant indebite se grauari quod litterarum ipsarum copiam quam nunquam habuerant eis facere contra iustitiam denegabat humiliter requisitus duxerunt ad nostram audientiam appellandum at idem abbas de Tyrhoupt legitima eorum appellatione contempta predictum ius patronatus in cuius possessione abbas et conuentus erant predicti eisdem episcopo et capitulo ut dicitur sententialiter adiudicare curauit Quocirca discretioni uestre per apostolica scripta mandamus quatinus uocatis qui fuerint euocandi et auditis hinc inde propositis quod canonicum fuerit appellatione postposita statuatis facientes quod decreueritis auctoritate nostra firmiter obseruari testes autem qui fuerint nominati si se gratia odio uel timore subtraxerint per censuram ecclesiasticam cogatis ueritati testimonium perhibere non obstantibus aliquibus litteris ueritati et iustitie preiudicantibus pro parte aduersa super hiis a sede apostolica impetratis Quod si non omnes hiis exequendis potueritis interesse duo uestrum ea nichilominus exequantur Datum apud Urbemueterem II nonas Junii pontificatus nostri anno secundo