Charter Document - 04140223

Anno domini MCCLXII pridie nonas Octobris Nos Ludwicus archidiaconus Carniole et Marchie iudex a sede apostolica delegatus in causa siue lite quam mouet magister Heinricus canonicus sancti Andree Frisingensis contra venerabilem dominum electum Lauentinum ac eius vicarium super ecclesia sancti Petri Salzpurgensis diocesis in termino peremptorio partibus prefixo presedimus iudicio circa vesperam in ecclesia sancti Nicolai apud Laybacum ibiquc coram nobis lectum est rescriptum domini apostolici uobis directum in hec uerba [] Quo perlecto ex parte dicti magistri H comparuit magister Chunradus canonicus sancti Viti Frisingensis gerens se pro procuatore ipsius exhibens procuratorium signatum sigillo venerabilis patris et domini C Frisingensis episcopi ac eiusdem magistri H in hec uerba [] Prefato itaque magistro C habito a nobis pro sufficienti procuratore ac legittimo probatoque ab eo testibus idoneis ac aliis legittimis documentis quod predictus dominus electus et suus vikarius peremptorie sunt citati ad terminum prefixum et locum in ecclesia sua Lauentensi per litteras nostras ibidem publice lectas coram canonicis eiusdem ecclesie et quod nostra citatio peruenit ad ecclesiam sancti Petri de qua questio uertitur quod etiam ad aures ipsius domini electi tempore congruo hec omnia deuenerunt idem procurator petiit a nobis ut cum ex parte aduersa nullus appareret legittimus defensor immo nec simplex nuncius eam contumacem reputare merito deberemus Nos vero equitatem secuti ipsam partem usque in diem sequentem decreuimus potius expectandam diem eandem precedenti diei quoad iudicium continuantes Sane eo die hoc est nonis Octobris presidentes apud Laybacum in plebe in ecclesia sancti Petri parte memorati domini electi sufficienter expectata ipsum dominum electum et suum vikarium contumaces iudicauimus iusticia exigente Verum sepefatus procurator magistri H petiit ut cum questio uerteretur super beneficio ecclesiastico obtineudo secundum constitucionem Innocentij quarti parte rea contumace existente etiam lite non contestata diligenter ipso examinato negotio idem deberemus fine debito terminare nec missio in possessionem causa rei seruande locum deberet habere in hoc casu ne ad idem beneficium ingressus pateat uiciosus Habito itaque bonorum consilio interloquendo decreuimus non obstante absentia partis contumacis ipsum diligenter examinare negotium et fine debito terminare Post hec prelibatus procurator obtulit coram nobis peticionem suam in scriptis in hec uerba [] Hac itaque peticione siue libello recepto ac ydoneo iudicato sepefatus procurator fidem nobis fecit per certa et indubitata documenta quod antefatus magister H extitit presentatus venerabili patri et domino Salzburgensi archiepiscopo a venerabili domino G Frisingensi episcopo ad ecclesiam sancti Petri Salzburgensis sitam in fundo ecclesie Frisingensis ad probandum etiam quod dominus episcopus Frisingensis verus sit patronus ecclesie memorate idem procurator produxit coram nobis priuilegium sedis apostolice concessum Frisingensibus episcopis ad domino Innocentio ii in quo manifeste conceditur Frisingensis ecclesie episcopis ut in ecclesiis siue monasteriis sitis sev fundatis in quacunque diocesi in fundo ecclesie Frisingensis sine consensv et uoluntate Frisingensis ecclesie episcopi presbiteri siue clerici minime statuantur Deinde idem procurator coram nobis edidit quedam capitula siue articulos qui uidentur facere ad plenam instructionem sue cause quos se probaturum dixit per testes legittimos et omni exceptione maiores non tamen astrinxit se nisi ad ea solum probanda que sue sufficerent intentioni petens ut alicui discreto committeremus qui ipsos audire et examinare deberet et alia facere que circa his fuerint oportuna cum multi ex ipsis sint senes et ualitudinarii et nostro se de facili non possent conspectibus presentare Que omnia secundum iuris debitum duximus admittenda Acta sunt hec assidentibus nobis et presentibus honorabilibus viris domino Morhardo canonico Frisingensi plebano de sancta Maria domino Heinrico plebano sancti Viti Hermanno plebano de Wodiz Gotfrido vicario de Lonk Marchwardo sacerdote et aliis uiris prouidis et honestis In horum euidentiam presens scriptum nostri sigilli munimine et prefati domini Morhardi fecimus consignari