Charter Document - 04140197

Sanctissimo in Christo patri ac domino A sancte Romane ecclesie summo pontifici frater Gotfridus sacerdos hospitalis sancte Marie Jerusalem officialis domini B Olmocensis episcopi delegatus a domino [] Salzburgensi archiepiscopo et legato cum filiali obediencia deuota pedum oscula beatorum Sanctitati vestre presentibus innotesco quod cum magister Vlricus canonicus sancti Andree de Frisinga super ecclesia de Probstorf Patauensis diocesis venerabilem patrem dominum O Patauiensem episcopum coram me auctoritate delegata a venerabili patre Salzburgensi [archi]episcopo et legato traxisset in causam magister Vl de Hartkirchen et Wolgangus de Otlingen procuratores dicti domini Patauiensis quasdam exceptiones declinatorias iudicii proponere curauerunt asserentes eundem dominum O venerabilem Patauiensem episcopum a me grauari indebite causas subscriptas allegantes quas de uerbo ad uerbum feci presentibus subnotari quas per modum appellationis cum easdem per modum exceptionis admittere nollem proponebant hoc modo Quia a uobis frater G hospitalis sancte Marie domus Theutonicorum qui uos geritis pro iudice delegato a domino Vl venerabili archiepiscopo Salzburgensi reuerendum dominum O Patauiensem episcopum in causa quam commouet magister Vl canonicus sancti Andree de Frisinga super ecclesia de Probstorf ex subnotatis grauaminibus per uos grauari sensimus et sentimus nos Vlricus de Hartkirchen et Wolgangus de Otlingen plebani Patauiensis diocesis nuncii et procuratores dicti domini nostri episcopi Patauiensis nomine suo a uobis ad sedem apostolicam appellamus primo uidelicet quod terminum peremptorium adeo coarcastis quod tempus sibi in iure concessum a tempore sciencie non cucurrit secundo quod subditum suum dominum Wisentonem decanum Wiennensem plebanum in Brobstorf citare presumsistis cum domino archiepiscopo cuius auctoritate uos dicitis hoc fecisse non sit licitum nec in casu uel in casibus quorum hic nullus reperitur suffraganei subditum iudicare vnde uobis similiter et per consequens minime est concessum tercio quod extra metropolim predictum dominum episcopum nostrum tanquam ut non suus iudex ut fatigaretur expensis et laboribus euocastis quarto quod traxistis ipsum dominum nostrum ad locum non cathedralem ac etiam minus tutum Quare personam prefati domini nostri episcopi cum omnibus iuribus suis in ecclesia Brobstdorf apostolice sedis defensioni subicimus a uobis litteras dimissorias siue apostolos cum instancia primo et iterum ac tercio nobis dari petentes et eos qui sunt presentes super hiis omnibus in testimonium inducentes Facta est autem hec appellatio in parrochiali ecclesia sancti Jacobi in Bruenne V idus Nouembris anno domini MCCLVIII Quanquam autem exceptionibus istis sufficienter respondere possem et appellationem non admittere sicut aduocatus actoris sufficienter declarabat reuerencie tamen domini Patauiensis nec non et uestre sanctitati deferens appellationem admisi assignans eidem domino Patauensi episcopo trium mensium spacium ad appellacionem suam prosequendam infra quem terminum a recepcione presencium se debet nostro conspectui presentare Datum Bruenne anno domini MCCLVIII V idus Nouembris