Charter Document - 04140074

In nomine sancte et indiuidue trinitatis Chuonradus diuina fauente clementia Romanorum imperator augustus Si uenerabilia ecclesiarum dei loca alicuius doni incremento sublimare studemus id profecto nobis nostrique regni statui liquido proficere minime diffidimus Quapropter omnium Christi fidelium presentium scilicet ac futurorum nouerit uniuersitas qualiter nos diuini amoris instinctu pro remedio anime nostre ob interuentum et petitionem dilecte nostre coniugis Gisile imperatricis auguste necnon Heinrici regis filii nostri ob iuge etiam deuotumque seruitium fidelis nostri Egilberti Frisingensis ecclesie uenerabilis episcopi eidem presuli sueque ecclesie Frisingensi largiti sumus in Orienti parte iuxta fluuium Urula uocatum in comitatu marchionis Adalberti cum omni lege hobas regales duas que antea ad Murun sui iuris curtem ibi iuxta iacentem ex rebus regni pro beneficio concesse sunt et insuper hobam unam regalem prope fluuium eundem inferius iacentem quam habuit in beneficium predictus marchio Adalpertus et etiam in medio utrarumque partium iugera xxx supradicte curti contigua que Aribo de Ensinburc in beneficium habuit cum omnibus eius appenditiis areis edificiis exitibus et reditibus uiis et inuiis cultis et incolendis quesitis [et] inquirendis agris campis pratis siluis uenationibus aquis aquarumque decursibus molis molendinis piscationibus seu cum omnibus utilitatibus que sic dici aut scribi possunt easque per hanc nostram imperialem paginam de nostro iure et dominio in eius ius et dominium transfundimus et in proprium tradidimus ea videlicet ratione ut iam dictus presul suique successores liberam deinceps potestatem habeant in usum ecclesie quicquid eis placuerit faciendi Insuper vero eidem episcopo confirmauimus ibi cetera sui iuris bona a termino orientali ubi Liudzimannespah influit Ibisam et inde Phezniza deindeque Rudnicham itemque a termino occidentali a uilla Chrellindorf usque in fluuium Zuchaha et ad Rudnicham sicque ad montana Carinthiam respicientia Et ut hec nostre donationis immo confirmationis auctoritas stabilis et inconvulsa omni euuo permaneat hoc preceptum inde conscriptum manu propria corroborantes sigillo nostro insignimus Signum domni Chuonradi Romanorum imperatoris augustissimi Purchardus cancellarius uice Bardonis archicapellani recognoui Data nonis Maii anno dominice incarnationis millesimo XXXIII indictione II anno autem domni Chonradi secundi regnantis X imperii VIII Actum Radaspone feliciter amen