Charter Document - 04140058

In nomine domini nostri Jesu Christi Incipit commutatio bone fidei uenerabilium episcoporum Egilberti et Odalrici Patescat liquido cunctorum Christi fidelium agnitioni pariter et omnibus inquisitoribus huius rei qualiter apud uenerabilem Frisingensis ecclesie Egilbertum presulem et domnum Odalricum Tridentine sedis episcopum dignum iam uisum et utile quoddam inter se pactum commutationis agere quam et fecerunt utraque ex parte communi deliberacione et concordi unanimitate Ille uero deo dignus antistes Egilbertus cuius supra mentionem fecimus cum manu aduocati sui Odalscalchi quandam sui iuris curtem Gudago uocatam ob remotissimam patrie illius longiquitatem haut apte satis eius usibus sitam cum totis rebus iuste ac legitime preter mancipia ad hanc respicientibus adhibito fidelium suorum consilio in manum prelibati presulis Odalrici eiusque aduocati Odalscalchi omnino tradidit eo rationis tenore ut iuxta condictum utriusque partis de rebus sue ecclesie in decimis uineis ac terris cultis et incultis ab eo in locis sibi propinquis nullatenus dubitaret accipere Econtra ille memoratus pontifex Odalricus cum in ceteris eidem concambio secundum placitum supra memoratum sufficienter responderet ac libenti animo satisfaceret mancipiis que in eadem curte inueniebantur nulla firma ratione ad hanc commutationem co[n]nexis sed sola promissione eotenus alligatis ut si paribus paria restituerentur et numerus congrueret numero firma quoque mancipiorum constaret commutatio ha inpossibilitate cautionem illam penitus euacuatam reliquit quod integre summam mancipiorum restituere non potuit Ob hoc contigit quod postea reuolutis quorundam annorum curriculis defuncto eodem Tridentino episcopo ab eius successore presule scilicet Odalrico nec non et a uenerando antistite Egilberto utrimque consentientibus ac in id ipsum conspirantibus eorum aduocatis cum fidelibus ceteris digne conlaudatum est ut illa prorsus commutatio ex utraque parte benigne remitteretur et utrique eorum sua uidelicet sicuti antea reseruarentur quod et ita miti amborum consensu factum esse probatur Huius rei gratia ne inposterum exinde ulla deueniat inquietatis molestia sub omnium circumastantium presentia amborum presulum carte hac de re dudum conscripte in partes secte et uterque eorum non partes que sue fuerunt sed que alterius pro testimonio reseruauerunt et ut hoc uerius credatur omnisque suspicionis difficultas penitus abscidatur placuit huius rei testes haberi et nomina eorum conscribi Gotti Nithart Etih Azili Chadolt Vuolftrigil Grimolt item Azili Johannes Gozpreht Altman Alberich Ruotpreht Hartuuich Dietrich Jacob Perahtolt Hiltipolt Gepolf Cholo