Charter Document - 04140056

Postea item longo temporis interuallo placuit atque conuenit inter duos sancte ecclesie uenerandos pontifices Egilbertum uidelicet et Gebehardum quandam complacitationem facere sicut et fecerunt Predictus itaque antistes Radasponensis Gebehardus cupiens ex rebus terrenis et caducis eterna anime sue commoda preparare tradidit cum manu aduocati sui Willipatonis in manus reuerendi Egilberti Frigisingensis episcopi et aduocati sui Helmperti ad altare sancte Marie uirginis sanctique Corbiniani confessoris Christi quicquid iure hereditario inloco Legian dicto habuit in usum uidelicet canonicorum deo inibi iugiter famulantium absque omni contradictione post finem uite sue perpetuo existendum cum mancipiis utriusque sexus edificiis siluis uenationibus [et] omnibus ad locum predictum pertinentibus Econtra pius pastor Egilbertus cum consilio et consensu suorum fidelium retradidit Gebehardo coepiscopo suo ex rebus ecclesie sue loca sic dicta Legian Parpian Sutsis Tieres Albiun Tanurcis Tseuis Tsusis ad Seges forestum ad Gredine cum omnibus utilitatibus que in potestatem canonicorum supradictorum ab Ottone comite bone memorie in eisdem locis tradita uidebantur vt sicut dictum est idem episcopus Gebehardus et datum et acceptum usque ad finem uite sue potestatiue possideret postea vero in ius Frigisingensis ecclesie et canonicorum sepe dictorum et datum et acceptum in integrum refundetur Post hec antistes Gebehardus diuino conpunctus amore et ne aliquis locus inimicorum pateret insidiis die eodem omnem hanc que supra continetur traditionem sponte remisit et uestituram dati et accepti pio episcopo Egilberto contradidit in tantum ut proprio aduocato suo excluso quemcumque episcopus ex suis uellet super easdem res aduocatum constitueret quod et factum est nam ad ultimum Gebehardus episcopus res supradictas ab episcopo sedis Frigisingensis Egilberto in beneficium accepit Testes Odalscalch comes Etih Gerolt Odilrich Engildio Magnus Hoholt Guntpold Altman Routpreht Lieparto Ekkihart Aripo Otzi