Charter Document - 04130033

Ich Ulreich von Waltse hauptman ze Steyr vergich offentleich an den brief vor allen den di in sehent oder lesen horent daz iz dar zu komen daz mein housvrou ver Diemut hern Chunraden den Durst von stamen vor meinen hern herzog Rudolfen von Ostereich in den lantaidingen ansprach vur sich selben und vur ir erben und reu kind umb den hof daz Tiemdorf und swaz dar zu gehoret den er dem apt und der samenunge von Engelcelle [hiet] verchaufet und ward mir den chlager geantwurtet mit recht und vur ich der chlager und dem recht als verre nach untz daz der vorgenant Chunrat der Durst allen seinen recht gegen mir erlanget und mir redleich und rechtichleich enprast der vorgeschribenen sache mit recht wand ich des ganzen gewizzen han daz mein vorgenante housvrou ver Diemut und ire chind an den vorgenanten hof chain recht hetten noch habent so vertzeich ich mich und seu aller ansprach und aller recht di wir haben scholten an dem selben hof daz Tiemdorf und ist daz geschechen daz Neunburch in den lantaidingen vor meinen hern den vorgenanten herzogen Rudolven von Ostereich und den lanthern und daruber gib ich Vlreich von Waltse den prief versigelten mit meinen insigel ze einen urchunt Unt der sache sint gezeugen her Stephan von Meissow her Eberhard und her Friederich von [Waltsee] mein brueder her Ott von Celkingen her Ortlieb und her Hadmar von Winchl und her Rapot von Urvar der landsreiber in Ostereich und ander vrum leute den die sache chund ist Daz ist geschechen da von Christes gepurd waren ergangen dreucehen hundert jar und darnach in dem driten jar des andern sunetages in der Vasten