Charter Document - 04130026

Ich Sifrid von Hugenberg vergich und tun chunt allen di disen brief sehent und horent lesen di nu sint und noch chunftig werdent daz ich mit verdachten mut und mit gueten willen aller miner vreund und aller miner gerben dem erbern hern pischof Wernharten ze Pazzaue han aufgegeben und lediglich verchauft minen hof der da haizzet der vrounhoff und zwai guet auf dem Schefberg mit allen den und darzu gehort an holz an wisen und an acher besucht und unbesucht gestift und ungestift swi ez genant ist mit rechter verzicht mein und miner hausvrouen von Elspeten und miner geschwisteren swi di genant sint mit samt allen minen gerben di ich noch han und noch gewinnen mach ebichlich ze haben an allen chrieg als mit beschaidner red daz ich des vorgenanten guetes ze vronhof und ze Schefberg und swaz dazu gehort des vorgenanten pischofs Wernharten ze Pazzaue gewer bin ich und mein hausvron und alle mein gerben gen allen den di in darum ansprechent sein oder swen er daz vorgenant guet antwurt oder geit swa und sweu des durft wirt nach lanzrecht an seinen schaden Daz daz stet und unverchert ebiglich bleib des gib ich den vorgenanten pischof Wernharten disen brief ze urchunt versigelt mit meinen insigel mit hern Eschbeins von Hag mit Leupolz von Ydungsperg und mit Hainrichs insigl von Pochsrukk di mit samt mir des vorgenanten guetes gewer und purgel warden sint Da ist pi gewesen und zeuch her Pilgrim der schenk und mein her wort Perchtold von Hartheim und ander biderb leut genug Diz ist geschechen do von Christes geburt waren tausend jar dreuhundert jar in den ersten jar des nechsten mitichen in der andern wochen nach der phingswochen