Charter Document - 04130024

Charter Document - 04130024


Charter Number: 04130024
Cartulary Title: Engelhartszell, Zisterzienser 1227 - 1300
Charter Language: German
Charter Origin: Religious
Charter Type(s): Sale
Date: 1300
Date type: Internal, A.D., Feast
Resource Link(s): Monasterium.net

Charter:

Ich schwester Pazze di priorin und wir schwestern alle ze Munebach tuen chunt allen den di disen brief ansehent oder horent lesen baide die nu lebent oder hernach chunftig sint daz wir gemeinleichen mit gueten willen und auch mit rat bruder Bernhardes dez prior und der andern bruder ze Chrems dem ersamen hern abt Christianen und seiner samenung ze Engelcelle verchaufet haben unsers freien aigens ze Charnern daz geachtet ist auf vierdhalb phund pheninch gelt und ze Neundorf und ze Radendorf auf herbergen und auf paumgarten und auf weingarten drezzich und vier phunt pheninch gelten besucht und unbesucht um sechs und achzig phunt phening wienner munz und derselbig phening sei wir gewert und geloben den vorgenanten hern und seiner samenunge die vorgenante gulte ze schermen nach des landes recht also ob in selben gulte mit recht icht an behabt wird der wir nicht verantworten und geschermen mochten so schol wir in mit als vil rechter gulte unseres aigens daz wir anders wo haben iren schaden widerlegen Und ze ainer ewigen bestetichait dizes chaufes und dez gelubdes geb wir in disen offen brief daran hangent unsern insigel Dez sint auch gezeuge abt Eber von Zwettel und techent Gotfrid ze Chrembs und der vorgenant brueder Bernhart der prior und bruder Dominich von Chrems [] Daz ist geschehen ze Minnebach von Christes burd in dem dreuzehenhundertisten iar an den erbrn Wethe tach