Charter Document - 04130023

Wir Erchenger von Wesen und Otto von Waldek tun chund allen denen die disen brief sehent und horent die nun seint und noch chunftig werdent das wir mit bedachten mut und guten willen unser aller freund durch got und unser frauen willen und durch der guten bruder bet die da ze Engelzell got dienen sein gestanden genzlich mit verzicht von allem den recht und ansprach die wir heten oder haben solten von unser vorvorderen an den zehenthausern die hie benant sein da ze Wizenot an zwei hausern da ze Clafflbach an zwei hausern da zu grub an zwei hausern auf der hohe an zwei hausern da ze Stadlau an einz haus da ze Stekeich an ain haus da ze Neuhofen an zwei hausern da ze Oberneuhofen an zwei hausern also mit solcher beschaidenheit das wir und unser erben und alle unsere afterkunft furbas nimer recht oder ansprach auf denen vorgenanten zehendhausern sollen haben Besunder si sollen gehoren zu den vorgenanten gotshaus da ze Engelzell und denen brudern die got da dienen ewiglich on allen krieg []