Charter Document - 04130009

Wir Heinrich der elter und wir Heinrich und Wernhardt bruder di jungern von Schaunberch tun chunt allen den di diesen brief sehent und horent lesen di nu sint und chunftig werdent daz wir durch besunder lieb di wir haben zu dem erbern abt Christian ze Engelscelle demselben gotshous di gnad haben getan doch ze vorderist durch got daz man im ein phund salz des witen bandes ze einem mal in dem jar furen sol ze Ascha fur ungemout ebichlich auch sulen si her uf wider wazzers furen ungemout swaz in wirt weines in ir weingarten und swaz in getraides wirt uf ir achern und sol das ir bot bewaren daz daz vorgenant in worden sey uf ir achern und ir weingarten Swaz si vaz bedurfen niwe oder alt di sulen auch ungemout fur gen Si sulen auch furen zimber da si mit bezzern ir hof ob si verbrunen oder foul wurden daz si zimers bedurften als vil als ir notdurft dar zu ist daruber geben wir disen brief versigelt mit unseren insigel ze einem urchunde und bestetigt mit den zeugen di hie geschriben sint daz [ist] her Ditmar von Aystersheim her Chunrad der Stol her Rudolf der Schiuer her Sighard von Grube her Sibrant von Gelting und ander biderber leut genuch daz ist geschehen do von Christes geburd waren tausent jar zweyhundert jar in dem sechs und neunzigsten jar