Charter Document - 04120048

Thobias dei gratia Pragensis episcopus vniuersis Christi fidelibus per Pragensem ciuitatem et dyocesim constitutis salutem in domino sempiternam Inter opera caritatis elemosina est que opperit multitudinem peccatorum et diuinam offensam mitigat dat gratiam in presenti et addicit gloriam in futuro Sperantes igitur nos ad quecunque pietatis opera beniuolos et faciles inueniri vniuersitatem vestram requirimus et hortamur in remissionem vobis vestrorum nichilominus peccaminum iniungentes quatenus ad opus ecclesie sancte Marie virginis gloriose monasterii de Altovado quod construitur et construi debet opere sumptuoso nec ad ipsum consummandum proprie suppetunt facultates de bonis a deo collatis vobis vestras pias elemosinas et alia grata caritatis subsidia taliter erogare curetis vt per hec et alia bona que domino inspirante feceritis ad eterne possitis felicitatis gaudia peruenire Nos enim de omnipotentis dei misericordia et sanctorum eius meritis et intercessionibus confidentes omnibus vere penitentibus et confessis qui ad predictum opus manum porrexerint adiutricem xl dies criminalium et annum peccatorum venialium misericorditer relaxamus peccata insuper oblita vota fracta si ad ea redieritis offensas patrum et matrum sine inieccione manuum violenta ac iuramenta que fiunt animi leuitate vobis nichilominus in ipsius dei misericordia condonantes preterea indulgencias venerabilium in Christo patrum Fridrici Clyemensis Heinrici Lauentinensis Rogerii Seuerinensis Johannis Mokycensis Cypriani Vouensis Jacobi Acernensis Salui Patanaensis Danielis Laquedoniensis Perroni Larniensis Jacobi Treuentini Guillelmi Callensis Romani Croensis Berchardi Fulginas dei gratia archiepiscoporum et episcoporum eidem monasterio collatas ratas ac gratas habentes auctoritate qua fungimur confirmamus presentibus in perpetuum valituris Datum Prage anno domini MCCLXXXX tercio x Kalendas Ma[i] Pontificatus nostri anno xv indiccionis sexte