Charter Document - 04120036
| Charter Number: | 04120036 |
|---|---|
| Cartulary Title: | Vyšší Brod, Ocist Urkunden |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1290 |
| Date type: | Internal, A.D., Calendar, Episcopal |
| Resource Link(s): |
Monasterium.net |
Charter:
In nomine domini amen Nos Thobias dei gratia Pragensis episcopus omnibus in perpetuum Incumbit nobis ex debito pontificalis nostri officii ut iusta petencium desideriis audienciam cum efficacia prebeamus persertim cum eorum vota et puritas adiuuat et iuris explorati veritas non relinquit Ea propter notum esse volumus vniuersis tenorem presencium inspecturis quod nos ad preces et deuotam instanciam nobilis viri domini Alberti dicti de Stropniez donacionem legitimam et perfectam ville dicte Borsow cum iure patronatus ecclesie site in villa eadem quam ipse honorabilibus viris domino Ottoni abbati et conuentui ac monasterio ipsorum in Altovado ordinis Cysterciensis nostre dyocesis cum omnibus pertinenciis et iuribus ad eandem villam et ecclesiam pertinentibus pietatis intuitu de assensu nostro fecisse dignoscitur ex causa saluberrima et honesta auctoritate qua fungimur confirmamus ex certa sciencia atque vera et presentis scripti patrocinio communimus ita ut prefata villa dicta Borsow cum iure patronatus ecclesie iam predicte cum omnibus suis pertinenciis agris pascuis pratis aquis piscacionibus et iuribus omnibus ad predictos dominum abbatem et conuentum ac monasterium ipsorum predictum et successores eorundem in perpetuum inviolabiliter debeat pertinere Nulli ergo omnino hominum liceat hanc nostre confirmacionis paginam infringere aut ei ausu temerario contraire Si quis autem contrarium attemptare presumpserit indignacionem omnipotentis dei et beatorum Viti Wenceslai atque Adalberti martirum ac aliorum sanctorum omnium se nouerit incursurum In cuius rei testimonium istud scriptum fieri et sigilli nostri munimine fecimus roborari Datum Prage anno domini MCCLXXXX XIII Kalendas Aprilis pontificatus nostri anno duodecimo indictionis tercie