Charter Document - 04110017
| Charter Number: | 04110017 |
|---|---|
| Cartulary Title: | Urkunden St. Michael |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1268 |
| Date type: | Internal, A.D., Calendar |
| Resource Link(s): |
Monasterium.net |
Charter:
In nomine patris et filii et spiritus sancti amen Thidericus dei gratia abbas totusque conventus monasterii sancti Godehardi in Hildensem omnibus in perpetuum Quoniam temporis prolixitas aut malignantium perversitas aliquando solet res laudabiliter actas variis calumpniis infirmare necessitas exigit ut res geste scriptis autenticis memorie commendentur Hinc siquidem constare volumus tam posteris quam presentibus quod dominus Conradus miles dictus de Novali tres mansos sitos in Novali quos a monasterio sancti Michaelis in Hildensem iure tenuit feodali venerabili viro domino Ernesto abbati eiusdem monasterii quantum ad ius dictum voluntarie resignavit Nos vero cupientes eosdem tres mansos in nostram cedere proprietatem permutationem fecimus talem ut tres mansi et dimidius siti in Maldem quos dominus L dictus de Luttere et sui heredes a nobis tenebant quantum ad ius feodi cederent monasterio sancti Michaelis et illi tres mansi siti in Novali iam prefati in nostram cederent libertatem In cuius rei testimonium presens scriptum sigillorum nostrorum appensionibus duximus roborare Testes huius rei sunt Johannes Bertoldus Conradus sacerdotes et monachi sancti Godehardi et reliqui fratres eiusdem conventus Widekindus prior Hermannus Johannes sacerdotes et monachi sancti Michaelis et reliqui fratres eiusdem conventus Acta sunt hec anno domini MCCLXVIII XVII kalendas decembris