Charter Document - 04110010
| Charter Number: | 04110010 |
|---|---|
| Cartulary Title: | Urkunden St. Michael |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1200 |
| Date type: | Internal, Calendar, Papal |
| Resource Link(s): |
Monasterium.net |
Charter:
Innocentius episcopus servus servorum dei dilectis filiis Teoderico abbati et conventui sancti Michaelis Hildensemensis salutem et apostolicam benedictionem Dum religionis fervorem et monastici ordinis observantiam que in vestra ecclesia faciente domino laudabiliter observatur attendimus in id propositi et voluntatis inducimur ut honori ecclesie vestre benignius intendamus et vos dilectionis prerogativa prompto velimus animo decorare Hac itaque consideratione diligenter inducti et volentes ut in devotione sacrosancte Romane ecclesie fideliores semper existere debeatis presenti pagina duximus concedendum ut cum bone memorie Celestinus papa predecessor noster tibi fili abbas ut in diebus festivis mitra et anulo uti liceret indulserit successoribus quoque tuis qui se merito devotionis religionis eadem gratia dignos reddiderint eisdem insignis festivis liceat uti diebus Nulli ergo omnino hominum liceat hanc paginam nostre concessionis infringere vel ei ausu temerario contraire Si quis autem hoc attemptare presumpserit indignationem omnipotentis dei et beatorum Petri et Pauli apostolorum eius se noverit incursurum Datum Lateranum XIII kalendas junii pontificatus nostri anno tertio