Charter Document - 04110003

Silvester servus servorum dei omnibus christiane religionis cultoribus salutem et apostolicam benedictionem Cunctis catholice institutionis gubernatoribus cunctisque in sublimitate positis principibus notum esse volumus Bernwardum Hildensemensis ecclesie venerabilem episcopum in presencia nostra fuisse necnon indulgentias pro monasterio suo impetrasse videlicet in festo sancti Michaelis de quolibet angelo seu patrono quadraginta dies indulgentiarum unam karenam et mediam partem remissionis omnium peccatorum quas etiam per octavas eiusdem diei festi necnon in festivitate patronorum et in octavis eorundem fideliter sibi donari petiit In quo ob piam devotionem et sanctum studium domini filii sui Ottonis imperatoris iustum venerabilis episcopi desiderium ad effectum perduximus et votis eius obtemperavimus necnon in festivitatibus sequentibus scilicet Laurencii Tiburcii Assumptionis Marie Marie Magdalene Mauricii Vincencii sex milia dierum et unam karenam omnibus ibi devote occurrentibus concessimus De dedicatione quoque cripte et altarium septingentis et XX dies infra octavas nichilominus quo matutinis missis vesperis et completorio officiis interfuerint quinque milia dies et quadraginta annos indulsimus Qui vero diebus dominicis et per Christe eleisum limina eiusdem ecclesie frequentaverint et sanctorum Cecilie Clementis Felicitatis Katherine octingentis dies de iniunctis eis penitenciis si contriti fuerint Petri et Pauli apostolorum auctoritate confisi relaxamus Mandamus etiam ut nullus successorum suorum vel tirannorum aliud de loco prenominato diabolica suggestione animatus aferre presumat [] Datum Rome apud sanctum Petrum anno domini Millesimo primo apostolatus nostri anno secundo Auschultata est presens copia per me Johannem Bracht clericum Paderbornensis diocesis sacri imperiali auctoritate notarium et concordat cum suo vero originali de verbo ad verbum quod protestor manu mea propria