Charter Document - 04100155

Ich Seifride von Tomlingen vergich an disem brief vnd tvn allen den chunt die in ansehent I oder horent lesen daz ich einen hof dacz Tomlingen den Osterhouen der min rehtes aygen waz mit allem dem daz darzv gehoret besuchtes vnd vmbesuchtes ze dorfe vnd ze velde vnd ze holcze verchaufte han dem spital ze Regenspurch vmb einesvndzwainczke pfunt vnd drisich pfenninge Regenspurger vnd schol im denselben hove gestetigen versprechen vnd rehtuertigen als des landes rehte ist an swiu ez dem vorgenantem spital ze chriech wirte vnd han im darvber ze burgen geseczte Leutwinen den richter ze Ingolestat vnd Chunraden den Percheimer sinen bruder die auch des veriehent veri als hinnach geschriben stet an disem brief Wir Leutwin der rihter von Ingolestat vnd Chunrat der Percheimer sin bruder veriehen an disem brief daz wir burgen sin des vorgenanten Seifrides vmb die stetigunge des houes dacz Tomlingen den er dem vorgenantem spital ze Regenspurch verchaufte hat daz wir im den vnuerscheidenlichen gestetigen vnd rehtuertigen svln als des landes reht ist Vnd geben im darvber ze einer vrchvnde disen brief mit des vorgenanten Leutwines des richters vnd mit Chunrades des Pfefflines die des chaufes taidinger warn insigeln versigelt Des sint auch geziuge Otte der mvnzmaister Vlrich Zwigel Wernhart der Pekke Chunrad der Percheimer vnd Hiltbrant von Chesschingen Herman der Maier vnd ander bidewer leut vil Daz ist geschehen do von Christes geburtte warn tausent jar zwaihundert jar vnd in dem sehczkem vnd nivnczkistem jar des nehsten svnnetag vor vnsers herren aufertag